【曾智華專欄】情聖「曹厚人」上天堂

周一晚新聞界傳來非常突然又令人痛心的消息，資深新聞人鄭明仁離世。

對其他人突然，但對「快樂傳媒老是佛」來講，早有心理準備。

因仁哥早年曾患癌症，一度康復，但半年前表示——又嚟喇，今次更勁！

之後頻頻出入醫院，做各式診治及化療。

小弟再三提醒眾「老是佛」，一月一次的歡樂晚飯聚會，若非必要，切勿缺席，盡量改其他約會日期就就啦。點解？毋須言喻了。

認識仁哥多年，但一直交往不多，直至近十年佢正式加入「快樂傳媒老是佛」，接觸多了，亦了解多了，覺得佢為人頗具特色，值得一記，因實與其他報章老總級人馬有頗多不同。

一、外形與言談沒丁點文化味，但卻是個百分百書狂及文化水平極高。仁哥行出街，一定畀人以為是維園阿伯或深水埗街邊大叔，因佢由頭到腳入型入格，更經常拖住架阿嬸買餸車，成個拾荒者格局，其實內裏全部是珍貴書籍。仁哥有鋪癮，見書就買，尤其是絕版的，毫不手軟掃掃掃，掃到小貨倉也裝不下。點解？瘋狂愛書之人也。

二、點解佢綽號「曹厚人」？因性格粗豪，開口句句含XYZ，但並非攻擊性，只屬助語詞，久而久之，大家都接受佢講粗口為正常語言一種，唔講肯定出事，並賜以「曹厚人」綽號。

三、粗聲粗氣大開大埋的背後，原來鄭明仁是位百分百情聖。加入「老是佛」飯局後，次次必須提早告退，點解？「各位兄弟，小弟有一每日必須做的事，乃晚上九點就要抱老婆上床瞓。因佢行動不便，無法自己上床，兼希望我睡前抱一抱！」

仁哥，再見喇！上天堂見到施永遠，代眾兄弟擁抱佢可也。