【曾智華專欄】決不揸電單車

上周六到九龍灣取維修好的汽車，早上十點半，經過啟祥道、宏照道交界，遠遠見警車及救傷車閃燈，個心立時一沉。

緩緩駛過，哎呀，慘情，見到一架被撞翻的電單車橫臥路上，旁邊有一男子已陷昏迷，另一女傷者則仍有意識。

回家看新聞，原來是對六十開外夫婦，驅車前往飲茶，轉交通燈時被一輛私家車撞到飛起，私家車司機涉嫌「危險駕駛導致他人死亡」被捕。一次意外，一方可能坐監，另一方則拆散一對夫婦，生離死別。

過去數十年，N咁多人問我有冇興趣揸電單車，一律非常堅決回應——絕對冇！

事實，年輕時不少老友覺得揸電單車好型，尤其車住美女招搖過市時，更會惹來沿途艷羨目光，非常威風。

不過，到底電單車是「人包鐵」的交通工具，極度高危，就算你百分百小心，但只要有其他司機鹵莽，不小心輕輕一撞，已可令你輕則斷骨，重則從此半身不遂，甚至死亡。

生命之中，有一段日子的見聞，令我立下鐵心——誓不揸電單車。

正是1976年，在美國加州遇上交通意外，當年駕着小巴，雖則「鐵包人」，但一撞，仍受重傷斷腳爆頭，初步治療後，運回香港，送入瑪麗醫院骨科留醫。

整整兩個月，幾乎晚晚見到有鐵騎士因各種形式交通意外入院。多數斷手斷腳，不停呻吟，痛到嗌救命，最觸目驚心其中一位為跣胎，成架電單車攝入巴士底，你話可以傷得幾重？

一日又一日見到本來好「威風」的電單車駕駛者，不少變為殘廢，令臥在病床的我不停問：「值得嗎？」答案當然是——絕對不值。故此，當時已立下決心，永遠向揸電單車Say No！