【曾智華專欄】曾先生，有電話搵你

馬圈除咗馬之外，亦有不少花絮令人發生興趣，尤其涉及名人。

例如早前郭富城愛駒「舞林密碼」出賽，城城就大棚人（太太、經理人及老友）入場，發生小插曲，就是城城雖然貴為天王，又是馬主，但竟被拒進入快活谷亮相圈範圍。點解？因城城當晚只穿咗一件Polo恤而冇着西裝。

正是家有家規，馬會職員若因佢是明星而用另一個標準處事，當然是自己失職，同時也累埋郭富城，因必定被指：「歌星係咪大晒先？」

馬會乃一個「私人會所」，故此，不少規條要求所有會員及馬迷進入所屬場地時，必須遵守，尤其涉及形象方面，執得好緊。

小弟領過兩次嘢。第一次為約同行到山光道會所打吡酒吧傾合作，之前從未去過，唔知規矩，只隨意穿恤衫西褲，腳穿波鞋。一坐低，經理即埋嚟細細聲講：「曾先生，我哋借對鞋畀你好唔好？」意即指我對鞋唔合Dress Code，必須換，否則請離。當然換！經理送來一對歐洲名貴皮鞋，好舒服，着完幾乎想問幾錢，買咗佢。

另一次，有少少尷尬，某大董請到沙田董事廳觀賞賽馬。入到廂房坐底，又有黑色西裝經理埋嚟話：「曾先生，有電話搵你，麻煩出大堂聽聽。」

　佢一邊講，主人家大董一邊眼神調皮地笑。我心諗：「邊鬼個知我嚟咗喎，仲要打到去廂房，有乜咁大件事呀？」

一出廂房，經理已手持幾條名貴領帶：「董事房必須打領呔，請選一條。」

作為客人而不知規矩，皆因我大鄉里是也。

今晚特別留意快活谷之星「飲杯」，換上田雞排十檔，分多兩蚊，加上牌面潘頓隻「晨曦儷人」會W，可惜唔知佢出軟鞭定硬鞭？我決定飲返杯好過嘞。