【曾智華專欄】全球最重要的日子

今日乃地球上一個最重要的日子，因最高權力者將會誕生，正是美國總統。

不知大家感覺如何？小弟及一群長期觀察國際政治者，見到兩位候選人，皆感覺選唔落手。

首先當然是「隨口噏當秘笈」的特朗普，話佢狂又得，話佢癲又得，競選期間，信口開河乜都夠膽承諾，例如話會趕走所有非法移民。住過美國者都會問：「得咩？點做？唔該講埋政策落實方法！」

非法移民乃美國的老大歷史問題，帶來負面影響，但也帶來經濟發展的重大貢獻，支撐起成個底層經濟活動。

美國今天搞到刑事罪犯招搖過市可能成為總統，不知當地的知識分子如何吞得下。不過，你吞唔吞都好，全世界政治領袖都要諗定，佢一旦再掌權，如何過招。國際政治舞台，面一個，底又一個，可以非常殘酷血腥。

至於賀錦麗，當然也有機會成為美國第一位女總統。但至今佢最大賣點，正是特朗普冇的笑容及親和力量。在過去密集曝光的日子，大家睇唔睇到賀小姐有乜宏大發展藍圖（對美國以至對全世界）？近日尤其只是針對「狂特」冇邏輯的亂吠作回應，好似欠缺自己思維。事實，佢過往似乎亦冇乜重大貢獻。當然你可以話佢掌咗權可能就會有表現，係唔係呢？

今次形勢如此吃緊，唔排除又出現「死不認輸」玩翻枱事件。幸而暫時特朗普並非在任，冇權調動用政府力量去賴死。

但令人十分擔心，為美國是個「槍的國家」，多位在任及卸任總統皆曾受槍擊，因好多不正常人會對自己討厭的政治人物用暴力。

作為地球一分子，我只希望一切和平度過。