【曾智華專欄】「軟硬鞭」今季輸馬代表作

經常聽見馬迷谷氣到爆，點解？因又見到頂級高手「軟硬鞭」潘頓核突到爆式輸馬。事實，當佢表演極級騎功贏馬時，你無法唔拍爛手掌，但倒轉明目張膽輸瓜頂頭大熱時呢，你幾難唔㷫到講粗口！

小弟又如何？越來越覺得呢丁「馬場藝術家」充滿娛樂性，當人人大大聲嗌「嘩嘩咁都得？」時，我永遠會心微笑，當諧劇睇。相信與我同一心態的，還有一眾《賽馬日在線》主持，尤其黃以文老總。

剛剛周三，潘頓又再「表演」輸馬。第三場跑千二米，羅廄「綫路達飛」成頂頭大熱，獨贏賠率不足三倍。

開閘！哈哈，所有資深馬迷都心領神會佢呢場玩「唔去」，又窒又抽又軟鞭，入到直路明知大勢已去，肯定冇機會先輕輕掃兩鞭，跑第六，輸個幾馬位。

過終點時，黃以文以幽默語氣指出：「呢場乃今季潘頓頂級示範代表作。」

哈哈哈，當然在講反話啦，只揶揄呢位高手點樣視競賽小組如無物啫。最過癮，旁邊有位主持也接口：「係呢，哈，點解佢永遠瞄住其他馬籮柚嚟跑嘅呢？」

唔頂住前面馬屁股，點可以有藉口跑跑吓話前面馬窒步，逼住我要抽？

「軟鞭」出完，潘頓第六場即以「硬鞭」現真身，同是羅廄新馬，佢一出閘，你就知今次想贏喇。先霸靚位頂住其他對手，入直路，更連環車輪鞭，打到隻馬開花，險勝短頭，表現一百分。

同一個潘頓，同一晚演出，兩個極端，簡直香港馬場任縱橫。鬼咩，所有實力新馬，全落佢手中，人人買佢怕。明日必須留意佢兩隻短途新馬，練馬師早卜定佢騎，分別為「盈妍威楓」及「勤德俱備」，皆明日之星，佢霸住，肯定有料到。有運執到靚檔，我一於WP過關。