【曾智華專欄】經濟爆奢侈店謝

老友每月飯聚，交換最新江湖情報及各行業趨勢，小弟能夠足不出戶而知天下事。

席中有大集團主席，一個月飛N次，環遊全球，有傳媒高層、有教育界管理人……也有呢度去嗰度唱的歌星。

酒過三巡，集中「呻」的，仍是香港經濟。個個覺得政府立場Line to Take是「死頂」，不過，似乎與真像有頗大落差。人人擔心的，正是香港人的消費日漸弱雞外，更有大量外流化。

型佬F先發言：「各位，以前我配眼鏡，每副三千港元。如今，哈！搭轉車上深圳，即變六百元，手工、型號、質素全部相同，點搞？」

歌星A接口：「我不停到內地巡迴開騷，在中山早早買咗屋，自己揸車上落。個人大意，經常撞花車身及裙邊，以前在香港入親廠都要三幾萬元，如今？幾大唔X香港整，中山遍地車廠，剛剛整完新嘅一樣，三千蚊人仔找數。」

監製S依起棚牙：「各位，小弟最近在佛山做完種牙，上一隻香港做，二萬五。剛剛內地做，快靚正再送三次洗牙，八千五。」

終於輪到大主席發言：「各位使錢使得咁開心，連我老婆大人都係，日日上網睇淘寶買鮮花，個個咁，香港零售邊有得做啊？財爺出嚟死頂，話明天會更好。但如今發債當收入，咁都得？即係走去碌卡提款當收入？唔使還？各位，我剛剛走咗轉北京、上海及成都，昔日高消費場所，全部謝晒，已可反映整個中國的經濟走向有幾差。總之就似香港，兩餸飯排晒大隊，其他食肆則拍烏蠅。」

香港的整體消費趨勢，中正政府早年不斷提倡的「一小時生活圈」，弊在人哋咁平，我哋咁貴，有讀過下經濟理論者必知，當然是「平幣驅逐貴幣」啦。究竟我哋可以如何面對呢？定或繼續埋頭沙堆——我睇唔到、我睇唔到！