【曾智華專欄】今早聖若瑟堂必爆滿

今日標題，為小弟實牙實齒預測，雖則聖若瑟堂唔細，坐滿超過五百人，但必爆！

點解必爆？正因今早是人人（當然未必百分百）敬佩的前高官「孫公」孫明揚，舉行安息彌撒。

小弟打咗三十多年政府工，又是傳媒前線人，當然曾與不少頂級高官交往。高官圈，就是個社會縮影，千奇百怪人都有。

其實能坐到上高官位的（尤其大AO），當然個個身懷不同絕技。基於早年只有精英中的精英才有機會做AO，若經此梯階上到處長司級位的，多信心爆棚，心高氣傲，睇啲「渣人」（佢哋眼中的水皮友）唔起。

高官各具性格，個別甚為火爆，可以當眾M到下屬飛起，絕對冇面畀（因睇死你唔會辭職，兼升職與否操控我手）。有啲更習慣開會「掟File」，即將你畀佢的報告掟落地，甚至掟出會議室，相當具侮辱性。今時今日，呢類情況當然絕無僅有（係啩？），但上世紀六、七、八十年代閒過立秋！

早年的大AO，有兩位特別得到下屬敬重，因佢哋知道乜叫「尊重別人」，正是陳祖澤（John）與孫明揚（Michael）。John足智多謀，乜都睇通睇透，見到下屬做錯嘢、行歪路，只會加以提點，幫助開竅，從未聽過佢以「侮辱式」教訓任何人。

Michael又如何？也對時局世情瞭如指掌，經常氣定神閒微微笑，且公關工夫極佳，幾乎所有大小團體宴會都畀足面出席，且必有貼地話題。其中之一為講跑馬，真㗎，上世紀八十年代我訪問佢，就正正用跑馬來融冰，令節目更輕鬆。

「曾先生，其實跑馬好易贏，我也有一條必勝方程式。不過，現今工作繁重，冇時間落實，退休先啦。」

退休？退咗十幾年喇，從未出現馬場喎？靜靜喺屋企贏？