【曾智華專欄】真番茄做濃湯底茶記

為食乃小弟本色，朝又食，午又食，晚當然猛食，自然希望搵到多些出色食肆，一方面自己享受，一方面廣為介紹，利用個人綿力幫吓飲食業。

不過，自己一丁友，知得幾多？唔怕，為食同路人上百，一於日日互通消息。

「優雅Y」在觀塘返工，日日在此解決早午餐，上周見面，提議：「碌Sir，你快試吓開源道47號間『肆柒食堂』，佢哋朝早個番茄濃湯餐，竟然用上新鮮番茄打成，好重本，只賣三十六元。」

剛剛上周六到九龍灣驗車，放低後，即刻拖老婆大人飛的去。周末觀塘非常悠閒，與平日判若兩區。

目標食堂唔難搵，但弊在面對大街個門口封咗，要走停車場橫門。

入到去，發覺地方闊落，睇睇餐牌，價錢中等，立即Order「慢煮手撕雞番茄濃湯通粉」（早餐名稱都咁高檔，服晒）。老婆大人則選同是「優雅Y」推薦的「手工雪菜肉絲米粉」，聲明雪菜百分百自家製作，絕非行貨。

番茄濃湯餐先上，咦咦，真㗎喎，碗底有一粒粒新鮮番茄。整啖先……果然與其他餐廳的罐頭茄醬加雞粉混合的「湯」，高低大分別。手撕雞合格有餘，如此一個餐，加火腿炒蛋、多士及香濃奶茶，賣三十六元，究竟賺乜㗎？

老婆大人碗雪菜肉絲米，雪菜翠綠，一睇知新鮮做。湯底聲明是清雞湯，我又試一啖……應是真雞湯混合金寶罐頭湯，也是「重本之作」。

食飽飽，但見一個似足卡通人物、胖嘟嘟的黑衣少女經過，原來是經理Marley，禮貌周周，笑笑口問：「請問對敝店出品滿意嗎？」

咁鬼有禮貌，在今時今日茶記，認真罕見。我回應：「足90分，以後凡周末就來！」

係真定𠱁佢冇相干，最緊要大家都開心。