區瑞強揭全家皆唱得有意開家族騷 首跟弟妹區桂芬區瑞明同台丨獨家

區瑞強（Albert）將於下月舉行《區瑞強全民共享演唱會2024》，首度跟妹妹區桂芬和細佬區瑞明同台演出。3兄妹認為唱歌天份，遺傳自媽媽的音樂細胞，除了8兄弟姐妹都唱得外，連他們的下一代亦有好歌喉，Albert更有意開家族演唱會，集齊一家人同台演出留個紀念。採訪：杜杜 攝影：林賓尼

Albert笑言跟排第6區桂芬和排第7區瑞明，年紀只差2、3年，更投訴，「佢哋從來唔叫我阿哥，叫我阿強或者Albert！」

Albert笑言跟排第6區桂芬和排第7區瑞明，年紀只差2、3年，更投訴，「佢哋從來唔叫我阿哥，叫我阿強或者Albert！」

Albert今次開騷主題大玩親情，嘉賓會搵埋家人同台，他亦不例外，但兩個仔和妹妹區桂芬就試得多，今次決定搵埋細佬區瑞明，「真係破天荒3個人同台，細佬從來冇喺幕前唱過歌，其實佢都好鍾意唱歌，我有啲對佢唔住，好似阻住佢，我做歌手咁多年，佢邊夠膽喺我面前唱吖！」他們更會唱《問》，Albert說：「城巿民歌《問》係區桂芬原唱，今次難得首度演繹3人合唱版。」

小時候的Albert（右）、區桂芬（中）和區瑞明的返學look。

青年期的Albert（中）跟區桂芬（左）和區瑞明感情很好。

遺傳自區媽媽好唱得

3人追溯愛唱歌原因，應是遺傳自媽媽，區桂芬說：「細個喺屋企，媽媽最愛聽粵曲，仲會邊聽邊哼。」Albert自媽媽患腦退化才意識到她愛唱歌，「佢離世前1年，有次我車佢去飲茶，佢喺度唱歌，好好聽但唔知咩歌，可惜當時冇錄低。」不過真正啟蒙他們就是長兄區瑞華，Albert說：「8兄弟姐妹中我排第5，大哥大我4年，佢中學開始鍾意夾Band，我讀小學就跟埋去，後尾攞埋佢支結他自學，有次佢去比賽個結他手唔得閒，仲叫埋我去幫手。」

區家有個傳統，就是每年到影樓影全家福。（左一Albert、右前區桂芬、手抱BB區瑞明）

早已移民的長兄區瑞華（左二），返港探望弟妹。

區桂芬早在參加首屆《城巿民歌創作比賽》演繹《問》奪冠前，長兄已幫她報名《星報》歌唱比賽，仲攞埋季軍。至於區瑞明就笑言，負責幫大哥開騷做苦力，幫手推器材。Albert自爆區氏家族個個都唱得，「我兩個仔唱歌好掂，又係冇人教，區桂芬同區瑞明個女唱歌都掂，仲有我哋細妹同佢個仔唱歌又好叻。」這樣一講即令Albert有召集家族開Show的新構思。

Albert謂細個唔知自己識唱歌，直到上音樂堂唱歌攞A。

區桂芬出道不久便退出，全因上台太大壓力係咁震，「後來到音樂農莊做校長。」

區瑞明唔入行全因覺得自己屬於幕後，「我喺Albert公司做幕後。」