鄧麗欣拍MV奪去張文傑螢幕初吻 忘記向圈外男友備案 明年開紅館盼Cookies合體
鄧麗欣（Stephy）昨日（28日）身穿Deep V裙出席於尖沙咀某戲院舉行的新歌《戲一場》發布會，首播新歌MV，歌曲監製蘇道哲和MV導演Maggie也到場分享合作感受。
Stephy在MV飾演不同面向的角色，充滿電影感，更與打星張文傑有激情親吻戲，張文傑由Stephy的鼻錫到落嘴，並有一閃即逝的床戲。除此，Stephy亦有飲酒抽煙的鏡頭。現場歌迷問到新歌似王菲的唱法，Stephy表示王菲是其偶像，或許因此潛移默化，不過她稱是以作曲的林家謙demo的原聲唱法，喜歡他那種神秘感。
相隔9年再出個人單曲，Stephy表示3分鐘的MV有透不過氣的感覺，拍攝了24個小時有點累，加上9年來沒拍MV要適應。與張文傑的親吻戲是導演意念，她說：「她很尊重我，畀storyboard我睇，解釋畫面用意，大家都同意，我都覺得有咁嘅必要。」
Stephy笑言奪了張文傑螢幕初吻，事前她忘記向圈外男友備案，她說：「我知道有呢幕，但嗰時好忙，MV準備時間短，連自己都唔記得咗，事後先話畀佢（男友）知，佢講笑問可唔可以cut晒佢。（男友體諒？將來都可以接受親熱戲？）佢ok。我自己都要有底線，只要有必要同靚就可以。（有冇同男友講有床戲？）唔使講得咁清楚啦，等佢自己睇啦，都冇乜嘢啫。（咀戲很激情。）頭先係大螢幕睇，其實都靚嘅，同埋呈現到想講嘅嘢，如果冇呢畫面好難去交代劇情，出來效果比想像中好。」
叫前度方力申自己買飛
談到明年3月紅館演唱會，她表示公布後已有不少飛債。有否機會齊集9位Cookies成員？她直言也很想，拆夥後十多年沒齊人，若成事很有紀念性。Stephy會廣邀她們來睇騷，不過有兩位分別在美國和加拿大，若來港或要請假。會否請前度方力申睇騷？她說：「佢自己買飛啦。（現任男友一定捧場？）冇得唔嚟啦！家人同朋友一定會嚟。」
另外，問是否加盟寰亞唱片做馮允謙師妹？Stephy說是少少誤會，當日講笑而已，不是加盟寰亞唱片，她指其經理人公司與寰亞是同一集團，很好的合作夥伴，每次出歌或演唱會也給予支持。
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
