【曾智華專欄】高官識搞賽馬嘉年華？

賽馬旅遊，乃本欄率先大力倡議者。講咗成年，口水都乾，以為特首及旅遊發展局誓當耳邊風。因為負責賭博政策的麥美娟局長，以及旅遊事務的楊潤雄局長，皆「賽馬盲」，加上政府高層似乎冇個識馬（或者識都唔敢畀人知）。

反而行政會議之內，頗多馬主級人馬，包括張宇人、林健鋒、任志剛、廖長江、鄭慕智、劉業強及梁高美㦤等，皆是曾經或現任馬主，甚或是馬會董事，故對馬會在香港的角色，知之甚詳。

小弟一再咬牙切齒指政府不停走大雞，因雖成日話搞瞓身搞乜乜物物盛事、乜乜物物繽紛，但香港賽馬活動，擺明就是世界一級水平，亦有馬王級佳駟，每年的國際大賽亦有聲有色。更佔盡優勢，為十四億人的國家，只得香港可以獨家營運賽馬，亞洲除日本外，冇一個地方可與香港比併。

咁多先天條件，政府成隻鹿在眼前，也唔識捉嚟脫角，真令人抌心。

好彩，終於超哥開竅，起碼在今屆《施政報告》中，提出「賽馬旅遊」。

不過，又弊，落在楊潤雄手，佢接受訪問時咿咿哦哦，一點積極意識都冇，只話要考慮眾多因素。

今鋪真係畀佢吹脹。賽馬由西方引入，本來是個全民的娛樂活動，係，有賭博成分，但識搞的，必定將賭博與跑馬分開，用熱鬧快樂的嘉年華會氣氛包裝。

沙田馬場最啱搞，賽馬日，彭福公園開放畀本港居民及遊客全家大細野餐，有小丑表演送禮物，有人唱歌跳舞……老友，再唔識搞就問我啦，真係Easy Job！

明天提供第五場WP「漣心聲」，高質素，從未排過好檔，上次試馬後衝甚勁，今次五檔，仲唔起筷咩？