【曾智華專欄】要孭飛的團隊何在？

有人話：「喂，碌Sir，為乜你成日啄住文化體育及旅遊局局長楊潤雄㗎？好唔公平啫，鋪鋪都要佢一個人出嚟孭。」

事實，小弟雖然覺得老楊表現麻麻，但政府作為一個團隊，真係似乎一有問題就個個彈開，變咗楊潤雄一士諤諤，好似乜都關佢事，衰乜都由佢答。

最簡單，動植物公園十二隻猴子因染疫死亡，楊潤雄並非專家，幾時輪到佢答呢？理論上，當然係漁護署署長第一個撲出嚟答。但佢有冇？冇！另外，處理這件極可能有機會爆鑊的事件，政府仍然慢三拍，未見調動「危機處理小組」（當然應該有病理學專家參與）。這個案，關幾多旅遊局事吖……

如今最重要是查出猴子死因，究竟中咗邊種病毒？可有機會擴散到人類？因猴子與人類的基因十分相似，故此，潛藏的危險性會頗高。

小弟身邊的專家朋友，尤其關注是否有一種名炭疽桿菌（Bacillus Anthracis）的病毒引起（詳情見台灣衛生福利部疾病管制署資料）。

小弟乜都唔識，但因在傳媒工作多年，瓣瓣專家都識。但當然，專家們除非政府主動邀請，絕不會自己跳出來發聲的。

再講楊潤雄乜都要孭，另一大鑊飯當然是啟德體育園。其中最多人擔心/關注是五萬人疏散會否出現一鑊泡。

咁大件事，當然應該成立跨部門小組處理，所有相關局長一字形排開，由政務司司長統領。去到疏散一瓣，理應由運輸及物流局局長林世雄答，解釋有乜部署，確保大型活動前後的運輸物流暢順運作。

我今日只講一瓣，其實大部分局長都應落水，最少派處長們出陣，因人人都有角色，絕對不能卸膊！