【黃庭桄專欄】男女大不同

難得出埠旅遊，當然是盡情食玩買，見到異地手信，怎能放過？音樂盒、磁石貼、天然手工皂、茶葉、地標小擺設……琳琅滿目，總會有一樣啱心水吧！

然而女人和男人，在購物的決策方面，往往截然不同。

「睇啱就買啦！唔使猶豫喎！最緊要自己鍾意。」男人會很決斷，鼓勵女人想買就買，不用三心兩意。

女人拿起心頭好，端詳一番，再看看價錢牌，掙扎片刻，又會嫌貴放下。但走不了幾步，依然戀棧，想回頭再看多幾眼，「或者在香港買，可能仲平好多呢！」女人喃喃自語。

「我哋不如再睇多幾間先，等我格下價，唔可以畀人搵笨㗎。」是不是每個女人，都天生一對消費精明眼？男人不知道，只覺得為了慳區區十元八塊，卻行餐死，不太划算。

「你哋啲男人就係唔識得知慳識儉，小數怕長計，呢度慳啲，嗰度慳啲，條數就好襟計囉！」女人曉以大義。

於是男人識趣地陪伴女人，由東街行到西街，行逛了幾十間舖頭，才發現，原來最初第一間舖頭才是最平，吹脹嗎？畢竟已經行到太遠，唯有打消走回頭路的念頭。

男人如果今晚想「7街瞓」，當然可以媽叉一句：「都話咗你啦！爭嗰廿蚊就咪鬼格價啦！蹝晒啲時間，麻鬼煩！」

本來是忘憂享樂之旅，實在不值得為了一件手信來嘈交，辛苦搵錢不外乎想自在享受，難得同遊，開心才是第一位！

男人可能比較粗枝大葉，只會着眼大事，一見到心頭好便會馬上買下，即使在轉角的路邊攤，發現同樣的東西比較平，只會聳一聳肩，摟着女人的腰說：「我哋今晚不如食餐好嘅！」

時光，要好好填滿快樂吧！