【曾智華專欄】添哥炮製「阿媽家姐」

香港飲食業，普遍人人叫苦，係真唔係真？係！因的的確確，市民凡長假就雞飛狗走，較富裕的到日韓台，基層的湧去大灣區。

情況合理。因香港消費，尤其飲食，相比上述地方，實在太貴。消費者當然擇優而噬，冇咁老襯「留港被劏」的（不少人諗法）。

我又如何？專與人潮走相反路線，你走，我留。例如上周重陽節長周末，揸車去邊都路路暢通，間間搵食都必定有位，呢種悠閒感覺，實在大享受也。

不停食呀食，幾個月前老友介紹下，識咗位昔日飲食集團行政人員「添哥」黃子添，退休後決定大隱於江湖，在上海街細細哋租間舖，做特色茶餐廳，名「喜鳳冰室」，為營造懷舊氣氛，牆上掛滿上世紀60、70年代街邊漫畫，燈光也用紫色作主調。

此店只做早午，四點收舖，供應的食物與一般茶記大為不同，因添哥就是喜歡與眾不同，包括外形，真係幾十歲紮起辮仔。

店舖關門後又如何？最精彩時段正式開始！因添哥晚上只招呼熟人朋友，表演私房菜，聲明係「阿媽家姐」（Omakase）。

總之，佢朝早行街市，發覺當日最新鮮係乜就買乜，然後拿回店炮製，客人晚上殺到，就可享受到一味又一味陸續上枱驚喜之作。

小弟剛剛周一宴請傳媒兄弟姊妹，一行七人，狂擦一頓，真的碟碟皆心血。

第一味上枱的黃金皮蛋（真是黃金色的）燒牛脷，已個個爭住打卡。食到尾，本來飽到上心口，但女士們一見即呱呱大叫，因佢哋有兩個胃歎甜品也。係乜？原來乃添哥老婆大人手製水晶餅，三款——金沙奶皇、芋頭及陳皮豆沙。

添哥會否為你做私房菜呢？唔知，但你可去上海街368號親自問吓㗎。