【曾智華專欄】馬會的「小家禮券」

馬會雖然是奉旨的獨家生意，無懼競爭，但在雄心勃勃的總裁應家栢領導下，仍有大型商業集團的運作精神，強調業績。

業績當然首要是論投注額，其次是入場人數、投注人數、「未來顧客」培養，以及將熟客牢牢箍住，一個都不可流失。

點搞？其中之一為畀甜頭。即你肯入場幫手製造氣氛（尤以沙田馬場為主），又或願在暑期繼續踴躍投注海外賽事（恍似服食「美沙酮」頂癮，以便開季後再全程投入），統統有獎。入場的，獎場內飲食券；電子戶口投注的，獎飲食集團禮券。

小弟乃忠貞馬迷，其實有冇禮券都會次次捐輸，因開心又好玩。不過，既然你送，咁又唔拘。

9月26日個人電郵信箱彈出馬會感謝禮券200大元，乃龍島Lucullus的，你可換朱古力，又或蛋糕。

名牌出品，質素保證，當然有興趣。但家住土瓜灣，附近並無此高檔貨門市，必須揸車到又一城或新世紀廣場，雖然煩啲，但無謂浪費咗200元禮券啦。

於是上周有空，揸車專程到又一城換領。點知……雖然是自己睇漏眼，但仍應有權火滾，原來馬會9月26日送你的禮券，9月30日就到期，即只得五日換領。

呢下真又要頂佢頭槌，竟然送得出，點解縮窒縮窒咁小家？大大方方有三個月限期唔得咩？搞到我泊車費都蝕埋，今次又要伸一腳應家栢，咁少優惠，可否有啲大氣度？

今晚快活谷賽事，特別有研究價值為第八場三班千二米。報名時賀廄「家樂龍駒」騎師為田雞，韋廄「競駿非凡」為班德禮。排位後，前駒改由潘頓出策，後者則變田雞。

呢場一於對碰W，再加田雞大P可也。