【曾智華專欄】應家栢，打劫呀

十次唔逢一閏，周三本欄貼士畀兩隻全中，百分百！不過……唉，慘被神秘勢力打劫，搞到我由龍蝦餐變兩餸飯，真係MM聲。

小弟貼士為「我做到」及「晨曦儷人」，前者隔夜開始由頭熱到開跑，冇乜蠱惑，非常正路。但「晨曦儷人」呢，呢隻馬一直次熱，入閘前仍有五倍，開閘！有乜變化冇人知，電算機都唔知，但過咗終點即通天，變兩倍！邊隻「神仙手」狂落飛？食咗三倍賠率咁？擺明夾硬打劫！

應家栢總裁，今日小弟擊鼓鳴冤，唔該你責成保安部作地氈式調查，搞清神秘勢力從何而來，是本港或是海外，與乜野人有連繫，一定要公布，唔該！

另外，大家也可當娛樂片，睇睇當晚第一場潘頓如何施展軟鞭大法，以大熱身份甩掉第四位，又再「私人醒」競賽小組一劑，當佢冇到。

小弟再三指出，「軟硬鞭」與「伸縮文」眉來眼去，總之，你博我就縮。第一場「架勢奇爸」博，立即有人遊馬河，四重彩都唔要。

我睇的網上直播台副主持好驚訝：「嘩嘩啦啦，咁都得？有冇搞錯？」

正主持氣定神閒：「第二個就會搞錯，佢咁跑就非常正路，絕無搞錯。」

娛樂性百分百！

明日開始有大賽，二級「沙田錦標」，過百分明星馬排隊亮相。不過咁，此乃讓磅賽，高分馬會否在這種場合搏盡，非常成疑，因獎金又奀又要讓磅，當然寧願保留實力跑一級平磅賽啦，你係練馬師也必如此部署，除非是已見頂老馬，執得一場得一場，怕玩唔長。

呢場馬，排位前有顯示，因只得四匹有確定騎師，包括：「永遠美麗」、「錶之銀河」、「越駿歡欣」及「禪勝輝煌」。其他馬真係「邊個得閒邊個騎」。我睇，冠軍就在以上四匹之中也。