專欄│期待港足歐洲友賽

踏入10月，香港足球代表隊遠征歐洲，香港時間10月11日友賽列支敦士登。港隊世界排名157位，列支敦士登203位，港隊是否可以在新帥韋斯活帶領下打響頭炮？

韋斯活今次點兵，揀選了大埔新星尼高拉斯，這位23歲新人可踢左翼、左閘甚至前鋒，勝在速度快及進攻意識強。早在上季港超，此子踢深水埗時有場比賽個人連中三元，敢於起腳而且有一定準繩度，如果繼續進步成為常規港將，未來可以是港隊進攻武器之一。

以往港隊有過速度飛快的麥基、高梵，可以在邊路進攻或者突擊時貢獻港隊。今次加入尼高拉斯，到底韋斯活如何決定他的位置都值得留意。數左路，港隊有孫銘謙、陳晉一，同樣可鋒可閘，再加上尼高拉斯輪換，絕對不愁無人。

除了尼高拉斯，東方中場吳宇曦近期在亞冠盃2主場鬥廣島三箭後備上陣時展示突破對手的盤扭能力及膽識，同樣有入選今次港隊名單。以中後場人腳而言，港隊選擇甚多。但中前場人腳及組織能力，在黃威長期療傷缺態下，到底誰來輸送予安永佳、米高等前鋒發炮？韋斯活會否參考傑志做法，將祖連奴移入中路控球組織，然後兩翼及前鋒配合成為為進攻套路之一？10月11日港隊鬥列支敦士登，以上問題應該有個基本答案。吳家祺