【黃庭桄專欄】不能說的秘密

電視台小花黃翠如，近日多數穿鬆身裙和波鞋，亦見肚皮微隆，疑似有喜。但記者向她求證喜訊時，她尷尷尬尬地顧左右而言他，未有正面承認。

不過大家都會諒解包容她，只因記得也明白一個流傳遠久的禁忌：「如果大肚未夠三個月，唔講得畀人知㗎！因為BB會小器，萬一出咗咩事就唔好啦！」

約定俗成，即使已經踏入AI高科技年代，我們都會選擇寧可信其有，不想冒任何閃失的風險。

胎兒在頭三個月，胎盤發育較不穩定，流產的機會最高，往往容易空歡喜一場，承受精神壓力。有研究數據指，自然流產比例高達十分之一。所以孕婦寧願等到胎兒到了十二周之後才公布喜訊，心理上陀得較穩陣較安心。

站在玄學角度，如果太早告訴別人，生怕BB會小器導致流產，這個說法未免過於迷信。須知道嬰靈排隊輪候投胎，往往要等候幾百年，幾經翹首以待，才終於有轉世做人的黃金機會，他們又怎會因為小器而白白放棄千載難逢的投胎第一號籌呢？佢仲緊張過你啦！係咪？

「媽咪，不要看恐怖片啊！一陣間嚇親，動了胎氣就弊傢伙……你不要出席喪禮啊！有人覺得有沖煞，其實如果過度悲傷而影響情緒，懷胎日子又點會覺得開心呢？　隨時有產前抑鬱症呀。」肚皮內的BB精魂，心事可會知？

因為小生命是上天送來的瑰寶，即使沒有宗教信仰的準媽咪，都會乖乖聽從一些傳統禁忌，只求小寶寶順利出世，健健康康，守三個月秘密才分享懷胎喜悅，何樂而不為。