【曾智華專欄】上司幾時會要「提醒」你？

香港盛事安排，一單接一單；大型建設落成，一項接一項，包括機場三跑、航天城，以及萬人矚目的啟德體育園。

啟德體育園為香港歷史上最大型的體育建設，佔地28公頃，耗資超過300億元。

體育園肯定可以對香港的體育及演唱會事業，帶來龐大好處，若發展順暢，更可引動大串經濟範疇得益，包括：旅遊、酒店、餐飲、零售……貢獻深不可測。

好的方面，大家可以想像得到，但帶來的「挑戰」（近年人人用這兩個字形容唔掂、缺點、不足、弊處、擔憂、負面，甚至失敗，真的是好使好用），也大得難以估計。

大家見過當年宣傳到天花龍鳳的啟德郵輪碼頭，如今搞成點？

百分百大白象一隻，政府根本束手無策（其實個個知，應由政府操控甩掉到「郵輪碼頭管理局」，又或外判畀商界做），卡在官僚與市場之間，日日慘蝕。

再遠啲，香港國際機場開幕，也搞出大混亂，結果由江湖地位絕高的鍾士元爵士一錘定音：「此乃Teething Problem，任何國際大建設落成後，都會有此必經階段，不用大驚小怪！」

相對啟德郵輪碼頭及國際機場，啟德體育園的規模，也屬唔係野少，因涉及整體可以容納六萬五千多人的設施。

眾所周知，該處本來荒蕪一片，集體運輸並不完善，其他餐飲民生配合，亦肯定有排搞，如此狀態，一旦湧入幾萬人，大部分更是遊客，人生路不熟，心態是來使錢享受，對一切當然要求高。

特首早前巡完，不停「提醒」各負責部門頭頭要咁咁咁，我一聽，大鑊！經驗告訴我，當上司要開口「提醒」你這樣那樣時，即佢根本冇足夠信心，究竟實情是否如此？