【曾智華專欄】方仔霸住「伸縮文」

國慶日貼士瘀爆，必須錯就認，打就企定，鎖你！小弟純以「政治正確」貼馬，畀「龍之輝」，諗住合晒當日氣氛，點知臨場睇，弊！票數唔多對路，即係……即係幕後人唔郁手囉。反之，隻「美麗第一」打到2.2倍，擺明信心十足。結果，巴度又再做三級賽殺手，輕勝而回。

不過，呢場執到都冇味，Q派43元，對資深馬迷嚟講，蹝氣！

近期馬圈最搶眼現象之一，為方仔竟可霸住布文，而兩個如魚得水，不停贏馬。

眾所周知，當今邊個馬房想爭霸，無法，都要碼住「軟硬鞭」潘頓。但因「歷史關係」，方仔根本與潘頓絕緣，冇交易（想知點解，問馬圈高人啦，一定好多故事）。咁要殺馬點搞？徒弟何澤堯及陳嘉熙，隨時可以用，不過……老老實實，若何澤堯不是遇上「金鎗六十」，成績邊有可能咁亮麗？事實何仔騎功根本未算頂級，靠佢殺馬，唔多穩陣也。

布文不同，乃真真正正國際殿堂級，雖老老哋又重磅，但勝在經驗豐富，陣上走位尺寸拿揑精確（當然，其「伸縮功」也好勁），只要在手有贏得的好馬，會交得好準。

正因如此，今季方仔把心一橫，全面與布文合作，贏得的畀晒佢O趙，徒弟仔只好靠邊站，這也是馬圈中發生的現實。

有咗方仔大量供應兼攞埋其他馬房潘頓「食唔晒」的靚馬，布文今季成績必大大改善。方仔也一樣，有機再爭冠軍，到底有邊個練馬師唔愛威？

明日賽事，我專研究一場，正是第十場二班全天候1650米。

買邊隻？游達榮全日只出的一隻——「好好心得」！想睇佢功夫深度：此馬已八歲，上季尾仍可於同程跑第二及第四，未盡。轉到游廄，呢場盡地一煲格。我一W兩P捧佢！