【黃庭桄專欄】恐懼鬥室

要克服某種恐懼，最好的應付方法，是直視面對它，然後解決它，直至不把它當作一回事。

曾幾何時，我畏高，一旦去到高處不勝寒的地方，我會嚇到腳仔軟，不敢再前行半步，唯恐會掉下萬呎深谷，就此粉身碎骨，無啦啦一命嗚呼。

命仔，只得一條，如果因為玩一些高空歷險遊戲，或在高地欄杆邊俯視山下美景，一時不慎失足墮下，死得幾咁唔抵！

在昂坪的架空纜車，設有水晶車廂，地板是透明玻璃，讓遊客無遮擋欣賞腳下風光，但我一定耍手擰頭，寧願坐普通纜車。

因為我會杞人憂天，明知冇乜可能會發生意外，我也總是胡思亂想，自己嚇自己：「萬一塊玻璃碎裂，跌了下去，實死梗啦！無謂搵條命較飛吖！」

去了外國，見到有笨豬跳，雖然刺激，我還是做一個無膽匪類，不選擇成就解鎖，「如果條繩一斷，實死冇生！」

每次搭飛機，我又會心驚膽顫，特別遇上氣流拋上拋落時，人自然會嚇到瀨尿，因為一旦出意外，便難以逃出鬼門關了。

做人經常驚呢樣怕嗰樣，會失去不少人生樂趣，我開始嘗試去克服畏高的恐懼。首先我問自己：「到底我驚甚麼？」得出的答案是驚死！！我不甘心咁快死去，因為還有很多心願未了、很多事未做、很多地方未去過、很多遺憾還未彌補⋯⋯

當我直視死亡這課題，明白生死有命，無常如影隨形，死後的世界，又會是另一趟六道輪迴的旅程，我不禁膽壯了，豁然看生死。於是我敢於攀高山，玩高空滑索，坐直升機，遲早會玩埋跳傘。

當死都唔怕，人世間所有的恐懼和困難，其實都是微不足道。