【曾智華專欄】別人成功Vs.自己成功

社交平台上，留言千百，十之八九屬「憎人富貴厭人貧」、「我啱晒佢錯晒」、「撩交嗌或打」、「幸災樂禍」⋯⋯

不理想但現象正常。心理學早早指出，當一個人可以隱姓埋名，做乜都冇人知、冇後果時，體內的「魔鬼性」就多會跑贏「天使性」，幾惡毒恐怖嘢都做得出。故此，「網友」會化另一個名，似魔鬼附體般亂鬧亂噏，嚴格講，或許真的可以平衡平日受抑壓的情緒。

好嘞，到回復出真名真樣時，可能會立即變回知書識禮講道理有品味的「模範人」。

小弟社交平台有11萬多追蹤者，當然乜人都有，在我日日鎖戶之下，暴力政治觀、粗言穢語、猥瑣四級、胡亂替人上顏色、以動物或昆蟲形容對頭人⋯⋯ 幾乎全面消失，其實都咪話唔難得。

不過，留言的，發覺仍有七成情緒及意見相當負面，論理的少，發洩的多。

一般講，我都不會回應，嘥時間。反正言論自由，你信奉乜嘢價值觀或點睇人生人性，悉隨尊便。事實，可能你的人生際遇或身邊的人就是如此不堪，咁就真真幫你唔到。

不過，間中我仍是會回兩筆的，希望對方不會覺得老氣橫秋。

例如上周提及船記，在目前的市況下，做到出品優良，員工團結，至為難得，文章內分析其成功之道，點解可以由細舖搬大舖之因。刊出後，照例又是留言N咁多種，老規矩唔回應，只是有一條，忍唔住手，私人醒佢兩句，希望對方能有所啟發。

留言係乜？正是：「碌Sir，梗係啦，佢老闆行緊運吖嘛，當然事事順利好掂啦。」

我的回應：「做人若想進步，先要摒棄累死自己的觀念：別人成功因行運或靠擦鞋，我的成功則是實力表現。」