馮皓揚後悔放棄讀書入行想再進修 金像男配再演殘障人士曾經唔開心丨獨家

2022年，馮皓揚（羊羊）憑電影《媽媽的神奇小子》演少年蘇樺偉奪金像獎「最佳男配角」，最近同時推出兩劇《法證先鋒VI：倖存者的救贖》和《我們家的料理》，雖然前者再演殘障人士但唔擔心被定型，而後者首演BL劇亦比想像中易投入。重提放棄學業入行，他坦認後悔，正計劃繼續進修。採訪：杜杜 場地:The AIR (The ONE)

羊羊由於只得中五學歷，打算趁後生繼續進修。

17歲的羊羊憑《神奇小子》奪金像獎最佳男配角。

羊羊在《法證VI》演患有自閉症的「霍寶樂」，對於再演殘障人士曾經有少少唔開心，「本身有亞氏保加症都驚俾人定型，但我只係入行好初期啫，之後有其他角色畀我發揮到，人哋就唔會有呢個諗法。」他稱演殘障人士，在拍攝現場唔敢同人有太多交流，屬於自閉狀態。講到《我們家》首演BL劇，他大爆跟顧定軒初次見面被對方說話嚇親，「佢話見到對手係我先拍，唔知佢係咪講笑嘞！我最介意係佢個樣仲後生過我囉！」而A0的他覺得投入感情唔難，「唔使好親密，只係好close嘅同性朋友。」

羊羊在《法證VI》演患有自閉症的「霍寶樂」。

羊羊大讚戲中「姐夫」黃宗澤，能秒速入戲和抽離角色。

想挑戰人體極限角色

講到拍《媽媽的神奇小子》後，2021年公開宣布放棄學業專心演戲，羊羊坦認有點後悔，「嗰時簽嘅公司建議做全職演員，最初我係拒絕，到公司第2次提議，父母先開綠燈，但我諗住體驗吓先，不過公司想我喺社交媒體同大家講，呢樣嘢令我冇後路返唔到轉頭，諗返其實唔係咁好。」下月才20歲的他希望趁後生，彌補冇讀中六及考DSE的不足，「短期內會安排，睇吓點樣可以繼續進修。」

羊羊在《媽媽的神奇小子》演少年蘇樺偉。

羊羊未來希望挑戰高難度角色，不怕要狂減肥或者操肌。

羊羊之前在公司安排下報讀TVB藝訓班，上了一日堂便退學，他解釋當時只想爭取更多學習機會，想不到惹來熱議，「其實冇上藝訓班係因為有廣告要拍，加上突然間咁多輿論，都要時間消化，嗰時仲未成年唔知點處理。」沉澱後他認為要繼續學習，在藝術家馬興文協助下入讀演藝，「因為我冇考到DSE，只可以讀1個學期。」已簽約TVB的他希望挑戰高難度角色，「好似張家輝喺《激戰》或者賈玲喺《熱辣滾燙》咁，唔食嘢或者操肌，想像唔到佢哋點樣為套戲準備，好想體驗吓全身投入嘅感覺，同入劇組即刻就拍嗰啲角色有咩唔同。」

《我們家》羊羊跟相差10歲的顧定軒合作，全無違和感。

羊羊加入TVB後，首拍劇集《愛上我的衰神》。