【曾智華專欄】畀超級市場送貨玩殘

做人做事做生意，最重要係乜？正是信譽。當你建立咗一個「我就是信心」品牌時，真真條條大路通羅馬。點解？因一般普通人與營商者，皆冇「建立品牌」這個概念，反之，過咗海就神仙，呃得就呃，心諗，鬼叫你信我咩！

後者最多出現在「預先收費」的公司。無論是健身、纖體、美容、按摩、減肥、租乜租物，總之，要求你入會並預先繳費（當然話有大折扣）者，能夠由頭到尾履行承諾者，你話有幾多？

最近又一名牌健身集團話執就執，買咗佢會籍者，真係喊都無謂。

今日小弟有點㷫，並非畀人呃，而是畀一個著名超級市場點到冇晒癮。

事緣我不時有活動需要買酒，為免自己抬去會場，當然安排送貨。最近幫襯T超市買一批紅白酒，寫得清清楚楚收貨人姓名地址電話，找數時問收銀員會幾時送。

「先生，若跨區，10日內送到！」

為穩陣，我提早咗12日落單，相信咁大個集團，不會甩轆啩？

慘，我對佢有信心，結果點？第9日，去電酒家問收到酒未？答曰：「未喎，曾先生。」

到第10日，T超市承諾送貨的最後一日，又去電酒家，同樣回答：「冇酒喎，曾先生。」

我其實好好脾氣（係啩？），立即親身到超市搵經理，一五一十講完，佢好似唔緊唔要，打咗個電話，回應：「應該好快送嘞！」

「X經理（佢掛住個名牌），你集團承諾10日內送貨但冇送，我個大型宴會隨時畀你玩殘，冇酒點收科？咁嘞，請立即退款，我再自己安排，不過，聲明必定向你母公司集團投訴你及你公司，毫無信用及唔緊唔要處理手法！」

呢招有冇效？當然有！翌日早上立即送到。

但經此一役，日後仲幫唔幫襯佢呢？