【曾智華專欄】「嘉應高昇」Win硬？

馬季開鑼，又有長達10個月興奮期喇！記住人腦要不停用，可以度乜都得，但必須不停度度度。小弟一周兩次度馬，但覺腦筋暫時未有退化現象，相比同輩有啲話退休就身心退休，一日悠悠閒，真係睇住佢哋由手腳到腦筋都慢慢「退休」㗎。

明日戲肉「特首盃」，跑一班千二米，有點反高潮，因只得十匹馬畀面報名，巨星馬擺明唔多吼呢隻「高班盃仔」。不過，你唔吼，作為馬迷的我照度。

個個話呢場冇得跑，上季最大進步馬匹「嘉應高昇」Win硬，由52分起步，跑七場五W兩Q，加到111分，擺明今季國際賽棋子，加上潘頓由田泰安手上取回帥權，親自田草試閘又第一，磨到利晒，邊有得輸呀？

同意同意。但跑馬跑馬，總可能有意外，兼且W大熱啫，有冇冷腳出現呀？

呢場有幾隻可以飛起，包括「電氣騎士」、「八駿巨昇」及「人和家興」，皆快活谷馬，突然轉來沙田，面對馬王級，擺明墊底，熱吓身算。

「美麗奔馳」又如何？上季跑八場只執一W，95分，坐馬監。

「幸運有您」上季初博完四場，即刻謝過「謝老四」，103分，要有排減才見曙光。

呂廄「包裝必勝」本有多少機會，奈何上季呂健威為爭冠軍，鑑粗最後一日仍博，腳都軟埋。

意即只剩下三隻可跑二二三三。當中「水晶酒杯」上季最穩定，出九場三W三Q，呢場最低分，可博入腳。

另外兩匹，若「嘉應高昇」略有閃失，即可揭竿而起！賀廄「威力奔騰」上季尾仍大勇，今番由巴度轉布文，擺明伏兵。最大機會鍊低「嘉應高昇」為「美麗第一」，上季尾千二米一戰，輕鬆彈贏個幾馬位，仍有幾多在手，未知，用佢做膽！