【曾智華專欄】真真笑死冇命賠

香港人，不少雖被籠罩在整體低氣壓之下，幸而仍大量充滿古靈精怪思想與創意，一旦有「點子」，就會立即引爆。

近日最好玩當然是——情到濃時打羽毛球，又或有性呼喚時沖冰水涼等等「笑料」。

究竟今天是甚麼世紀？點解好多人的思想，竟比小弟上世紀六十、七十年代讀小學時更落後？

昨晚與昔日小六百厭星同學敘舊，大家當然冇興趣講政治，講乜呢？正是「當年我們是怎樣吸收性教育的」。

讀男校，和尚寺，但個個12、13歲已生理起變化，鬼靈精之下，點吸收性知識？

學校不單止冇得教，更禁止講，荒謬到中四、中五生物堂時，都只用魚呀、風媒花呀或青蛙產卵等解釋「傳宗接代」。最搞笑，當老師一本正經以為我哋乜都唔識時，其實個個早早在小六已帶齊各種成人雜誌返學校，互相傳閱。

結果，學校唔教，所有關於性的知識，就從坊間婦女雜誌、成人雜誌、各式小報及乜乜物物夫人信箱等吸收，如此，點會是正路？

更搞笑，當年校際辯論比賽題目，永遠是老套到爆炸的「中學生應否談戀愛？」。唔使問阿貴，當然抽到唔應該嗰隊贏啦，不過，現實中，一到中四、中五，男校開始可以與女校開舞會（即Party），立時唔知幾多人開始談戀愛。

對，當年談戀愛比較純情，但若成年人用強權乜都唔得，青年人會否睬你？

好嘞，勁搞笑！我哋當年一班出位百厭星已70歲，見證社會在性知識方面，已大大躍進，其實使乜學校教吖，單單網上，已N咁多性知識。如今政府不在中學推行貼地的性教育，反之，叫學生情到濃時打羽毛球？難怪國際笑甩牙咾。