【曾智華專欄】好食都唔返轉頭

今日標題有冇引起你好奇？出外覓食，你知我知，如今在香港，幾難搵到一間真正好食餐館，可以話十中無一。遇上，竟然唔返轉頭？

你一定會問：「係咪貴？係咪服務差？係咪裝修氣氛、冷氣⋯⋯唔理想？」甚或你可能會問：「你強調洗手間要清潔及有私隱度，係咪唔得？」

以上全部答案——唔係！

咁答案係乜？正是——負責人（老闆、經理或大廚），不適當程度的過分熱情。呢吓實在太難頂，令成餐飯由我自己到帶去的朋友皆極度不安及冇癮，但又唔好意思開口，結果係⋯…咪再搞。

起因當然因小弟在傳媒及飲食評論界有少少知名度，故此，當然特別多人希望我幫襯時有「愉快經驗」。

可惜，並非位位食肆負責人都明白，令客人有「愉快經驗」之道。結果，我遇過的：

一、老闆味味菜都推門（我多數訂房）入來親身介紹菜式。老闆通常為中年人，說話不少水花四濺，但又冇戴口罩習慣，於是⋯⋯在座客人紛紛你眼望我眼，老闆更唔識Do，為每味菜食到中途時，佢又推門入來問意見，味道得唔得？（大佬，你可否食完成餐先問呢？）

二、間中有大股東見小弟帶咗城中名人來，即頻頻借意先敬酒，後打卡，唔止佢，連門外的老婆親戚朋友都湧埋入嚟。喂，大家好熟咩？

三、上周又有奇遇。名店經理見第一次認識，真真老實不客氣，見我朋友帶來名酒，竟冇問就倒一杯⋯⋯先飲為敬。更離晒大譜，佢未徵求同意，就不單止灌一杯，而係⋯⋯每隔十五分鐘就入來敬酒（當然用我哋的紅酒），你話係咪MM咁嘅聲。

以上三個情況，真人真事真經驗，老友，你係我都從此拜拜啦。