【曾智華專欄】退休即圓少年夢

人生匆匆數十年，有些人會擦身而過，一閃即逝，有些則因這樣那樣的理由，常在身伴。另外，有些則可能是緣份使然，幾十年冇見，竟會在毫無準備及計劃下重遇。

小弟1978年加入TVB當小小助導，其時有機會見盡當代叱吒一時的電視台幕後巨星。我雖企埋一二邊睇，仍覺位位氣場逼人。

例如著名電視女強人周梁淑怡、《歡樂今宵》之母吳慧萍，更勁是有點天子駕勢的總經理陳慶祥，綽號「大陳」，每逢公司內出巡，例必有幾位高層在後，默不作聲低頭跟隨。

聽講不少中高層一見「大陳」，即會腳軟，可知其霸氣幾勁。

當時我同佢差十幾級，小薯仔，根本冇機會埋身，打招呼都是夢想。

時間飛逝，到咗九十年代，陳慶祥已離開無記，改投李澤楷旗下的衛星電視，而小弟則升吓升吓，升到做香港電台中高層，以及算是頂級訪問人，每周直播室皆能請來城中最當時得令的猛人對談。有次陳慶祥做嘉賓，發覺其霸氣已經冇咗一半，可能再不是權傾朝野，或是人生又升到另一境界。

時間飛逝，又三十年，前晚昔日立法會議員李家祥宴請上世紀傳媒朋友，又見「大陳」拖住1984年港姐亞軍太太，美麗的馬倩衡來到。

一見面，當然四手相握，此時，發覺「大陳」的霸氣已全面消失，年齡八字頭了，開始展露祥和之氣，且非常健談，又富幽默感。

「陳Sir，近日有乜搞呀？」我問。

「全職打工，份工是『玩樂』！我少年及童年時想做，但不能做及不准做的，一一做齊。例如先父話死飛仔玩意的打Band奏樂器，又或太危險冇得傾的潛水，總之就是盡速圓所有少年心願。」