【曾智華專欄】祝黃宗澤「好運」

被譽為電視圈「鑽石筍盤」的黃宗澤，正值當打之年，當然忙到甩轆兼豬籠入水，唔憂做，兼且咁靚仔，怎不大量美女埋身？

女性、財源皆無憂，遂會形成一套個人價值觀，回答記者時列出幾點看法與做法：一、好兄弟大過天，若未來對象不為兄弟接受，佢哋一「藐」就甩拖；二、女友必須迎合阿媽，但阿媽過往「十個唔滿意九個半」；三、為做嘢可以六親不認，只發展地下情；四、每月掟七位數字營運餐廳。

點解我只能祝黃宗澤「好運」？因幾十年來見證N咁多二十多至三十多歲的男明星，事業如日方中時，也有同樣諗法，結果⋯⋯回應以上四點：

一、女性除非唔愛你，否則一定要「獨佔」，最低限度，我是你生命中最重要的。你竟然話兄弟大過天？咁我企乜位？佢哋會同你天長地久生兒育女乎？況且兄弟聚散，也看各人際遇！女性初戀時，多會容忍你的兄弟存在，到談婚論嫁或成家立室後，你仍想晚晚與兄弟去Wet？發夢冇咁早！

二、要阿媽滿意。自古以來，婆媳關係，大多數是先天性對立的。你阿媽點解「十個有九個半唔滿意」？正是想獨攬兒子的關懷與愛。倒轉，澤仔的老婆也必如是。這個結，只可用極高EQ去拆，切勿幻想阿媽會突然接受你的對象，世界沒有天方夜譚。

三、為做嘢可以「六親不認」。目前可以，但人生是一個非常遼闊的關係及利益網，要關注的人和事相當複雜，長遠而言，絕冇「六親不認」空間。

四、商業世界，騙棍如麻，當然包括餐飲業。藝人紅搵錢易，想法比較單純，又沒有營運常識，加上忙，這種藝人最易變水魚。我見過的例子，多如天上繁星。