【曾智華專欄】《老嘢時速》過癮，睇啦

上周末在家趕稿，枱頭電話響起，冇來電顯示，通常不會接，但寫到悶悶哋，好啦，聽聽當玩吓。

「老竇呀老竇，救我呀！」

頂佢頭鎚，一聽就知電騙！點解？第一，家中的「排骨仔」只稱為父做「肥爸」，另外，剛剛佢在隔籬房打機，呢個騙棍真真斷正。

即時小弟百厭星性格突現，本想玩殘佢答：「衰仔，你為乜由長沙灣墳場骨灰盅走返出嚟呀？係咪唔夠陰司紙用？」又或：「你兜死仔應該鎖咗喺青山喎，又偷走出嚟？快啲報位置同電話，等我搵人捉你！」兩個答案在腦中閃出，不過，回心一諗，唉⋯⋯浪費寶貴時間陪騙子玩？嘥料，於是收線！

呢種阿婆、阿嫲、老竇或阿媽救我電話，其實幾十年前已有，家中長輩亦中過招，嗱嗱聲攞幾萬元去指定地點「救我」。結果⋯⋯當然係交咗重重學費啦。

呢種「救我呀」電騙，原來四海皆有，今期上映的《老嘢時速》，正是真人真事改編，個案來自編導Josh Margolin祖母的親身經歷。

難得佢又搵到一位九十三歲的阿婆演員擔正主角，正是荷里活綠葉王茱施潔比，拍咗七十幾年電影，估唔到九十三歲才爆出頭來，在爛番茄指數網中分數爆燈。

劇情一如無數受騙長者經歷，騙徒扮孫仔，話因撞車傷人被捕，要一萬元保釋金，必須即過戶畀「律師」才放人。

阿婆救孫心切，中招。不過，知道受騙後，劇情進入精彩部分，好過癮，大家可入院欣賞。

小弟也是長者，對戲內不少場面深有共鳴，例如N種老人病纏身，同輩朋友的際遇⋯⋯

不過，《老嘢時速》最令「老嘢」振奮，為九十三歲仍可大戰騙徒而贏得清脆俐落，情節令全院觀眾樂不可支，大呼正呀，哈哈！