【曾智華專欄】大把客但冇得做

網上日日公布食肆執笠，不少有相當歷史，例如土瓜灣美善同道的「蘇三茶室」，經營二十年，積下不少熟客，但結果仍公布9月下旬結業，原因是——唔夠客。

令人非常氣餒，是不？但奇在佢隔籬兩個舖，剛剛又有一間Cafe開業，顯示市況仍是有人辭官歸故里，有人漏夜趕科場。

其實就我觀察，香港飲食業並非無客。最簡單，我身邊最少有幾百為食鬼，不停想搵好嘢食，一聽到邊間正，就飛撲而去卜位。

例如早前重新開業的阿鴻小吃，以及幾年前因身體筋骨嚴重勞損休息，剛剛唞夠再戰江湖的基哥，你想訂位？非常難！

不過，大把客湧上門又如何？東主仍是滿肚苦水喊咁口。

炒粉絲蟹煲及蒜子肥鱔炒到會飛的基哥，重新開業第一日，已「大受打擊」。皆因佢新舖可以坐五圍，早早訂滿晒。廚房佢自己孭起，樓面則親妹阿Anne睇，兩個拍硬檔多年，基本上頂得住。但有個崗位必須請人，正是清潔洗碗！辛辛苦苦打晒鑼搵人，結果有位阿嬸肯做，條件——只收現金，150蚊一個鐘。

聽落幾爽，只要每日做六個鐘，即有900蚊Cash，做足三十日有27000蚊。

不過⋯⋯慘情，阿嬸一返工，見到坐滿五席，竟呻：「嘩咁多嘢洗，唔做啦！」講完就調頭走。問你服未？結果當然又係老闆兼大廚基哥同佢個妹孭埋。

基哥訴苦：「碌Sir，香港飲食業死症，不是無客，而是租金高，冇人手，點做？」

有飲食業老行尊報料：「其實不少阿姐一邊收綜援，一邊做現金工，都唔知幾疏乎，故此，少少辛苦都冇興趣做，因為佢哋基本衣食無憂。」

擺明人手不足是死結，唔解決就攬炒，政府可以做乜？