【曾智華專欄】好嘅唔靈醜嘅靈

昨日提及特首《施政報告》正在徵求民意，大家有乜意見，作為「熱愛香港一市民」，想講就快啲講（不等於會被採納）！

小弟從來對香港意見多多，但冇咁好氣講得晒，只是經常出出入入旅遊，見到不少情況極不順眼。

第一頂唔順隻「大白象」郵輪碼頭，根本浪費納稅人錢，日日在拍烏蠅，眼都冤。

呢個碼頭，當公布「煲呔」研究拍板由政府孭起時，我已多次在電台公開力陳萬萬不可。因公務員從來冇生意頭腦，亦唔會積極搵錢，基本訓練只為守章則，Never Think Out Of The Box，除「做又三十六，唔做又三十六」傳統思維外，最怕畀人覺得「官商勾結」，過分表現想搵錢是原罪，知冇？

所以在商業世界中，明明是鑽石的一切，落在公務員手上，必定變爛玻璃，冇晒價值。

舉個實例，大家可記得領展上市前，屋邨商場幾惡頂？又舊又爛，廁所塞晒。你投訴？分分鐘十問九唔應，就算應完都係Hea吓你算，永遠冇人裝修、冇人翻新，只得個殘樣。

好嘅唔靈醜嘅靈，我所有當時的反對意見，可能網上仍有得翻聽（啩？），中晒。

如今「大白象」既成事實，點搞？再靠楊潤雄？咪講笑喇。唯一解決方法係用機場及港鐵模式，成立一個以商業原則營運的局去獨立處理，政府咪再上身。

希望今次《施政報告》一錘定音！

另有一樣濕碎的政策，想講好耐，是坐高鐵回港的戇居安排。

遊完內地，用回鄉證出境。回到香港，用身份證入境，查來查去已畀人麻煩多餘之感，算嘞，最離譜，你過晒關，入咗香港，出高鐵閘，竟再要排隊「嘟」多次回鄉證，為乜？

以今時今日的科技，堅持呢個政策者究竟有冇腦？