【曾智華專欄】批評政府驚恐症

近日特首超哥不停上電視：「各位市民，《施政報告》將於10月發表，現正進行公眾諮詢，歡迎提出意見。」

意見，可以是對現狀批評，又或提出改善空間。合用的，各司局長包括特首，就理應考慮採納，加以實行。

弊在近三年香港瀰漫著一股情緒，可稱之為「批評政府恐懼症」，不少人日日你嚇我、我嚇你，無限放大到——咪批評政府呀，拉你㗎！

聽一兩次，當講笑，但日日聽，無法不產生極度厭惡感，香港真係變成咁？

小弟上世紀七十年代加入傳媒，經歷八十年代言論自由起飛（當然與政治變化有關），九十年代至過渡前大鳴大放。做電台的，真係去到「噏得出就噏」地步。尤其罵官，由末代港督肥彭開始（佢帶頭叫你挑戰政府），到所有高官，政治評論員可以公開肆無忌憚地鬧。

我當時也做第一線節目主持，對個別同業作風都有啲「震撼」，不時覺得太過分：「老友，使唔使咁呀？」

結果，變幻才是永恆，今天的情況剛剛變倒轉，冇癮，我又想問句：使唔使咁呀？不少人極端地縮，縮到一切公共政策及掌權人物皆不敢批評，極不健康。

對，無謂自己呃自己，現今的確不少紅線出現，尤其涉及國家安全。但除此之外呢？

政府架構，包括N個局及部門：醫務衛生、旅遊體育、教育文化、環境生態、民政社福、商務經濟、地政發展、財經庫務、公共房屋、創新科技及運輸物流⋯⋯以上有邊瓣會滿是紅線，而你批評吓都要驚被拉被鎖的呢？大家乜都驚恐，等於自我捐入暗井度捱日子，有必要咩？

我曾在本欄力指謝展寰及楊潤雄兩局長嚴重失職之處，之後有冇問題？零！