【曾智華專欄】內地覓食的疑惑

遊順德，當然四圍食食食。一邊食，一邊腦內彈出不少疑問。例如點解唔見各式煎炸、豉油或燜雞翼菜式？點解市場冇乜急凍肉類食品⋯⋯

終於有一日食到去某間名牌酒店中菜廳，發覺早茶點心甚正，剛剛見總經理Simon行過，捉住佢問，正因此君乃香港仔，好啱傾，故此知無不言，令我開竅。

「碌Sir，內地為保民生安定，故設有物價局控制物價。例如豬肉，為保豬農，故此入口急凍貨稅率特重。就咁，我哋當然只用生劏本地豬。」

「咦，呢個用重稅鍊入口貨做法，與美國一樣喎。不過，入口內地的急凍豬，雪到『木』晒，就算與新鮮豬肉同價，都應瓜直啦。」

「另有樣受歡迎食品，好多客人問我哋點解冇，唉⋯⋯又係因成本高囉！」Simon冇癮話：「正是雞翼！要做豉油雞翼或炸雞翼，想大隻啲，只可用入口貨。但為保護本土雞農，外來雞任何部分都貴得多，點搞？」

不過，Simon的廚師仍搞出一味威震順德的鮑汁雞腳，秘密是重本少少都用急凍巴西雞腳，貪其肥大肉厚，骨膠原豐富。其他廚師用內地雞腳，細細隻，冇口感滿滿的效果，輸一條街。

講吓講吓，我倆最有共鳴為覺得內地客專誠到香港食燒鵝，極端荒謬。

「大灣區大把燒鵝，新鮮劏，夠肥美，兼且可以用荔枝木真柴燒，皮脆肉厚又多汁，出爐即食，嗰種美味，比對香港用冰鮮貨，邊度有得揮呀？難明點解咁多人儍吓儍吓去香港排隊！」Simon的疑惑，我早早有。事實，我凡想歎走地靚雞或新鮮燒鵝，必回順德，因質素根本無得比也。

唯一解釋，北方同胞比較烏卜卜，只靠網上旅遊訊息，於是誤會香港急凍燒鵝更正啩！