【曾智華專欄】「你搵我唔到」的新名店

老友H哥喜慶，開心召飯。佢老哥交遊廣闊，食盡香港，晚晚大吃大喝，冇乜邊間「米記」（米芝蓮）名店未試過。請食飯，當然唔會揀行貨。

「碌Sir，今次去一間好難搵的新店！」

「老老實實，H哥，天時暑熱，唔該咪搵間雷公都打唔到食肆呀，大佬，你就有司機啫，我畀網約車費都乾塘㗎。」

「唔遠，就在灣仔鷹君中心樓下，好就腳！」

時間到，飛的過到鷹君中心，約七時，仍熱到汗流浹背。大寶號地址寫G4，但搵呀搵，成座鷹君中心樓下兜咗兩次都搵唔到，有冇搞錯？撞呀撞，撞正同被邀的兩位美女行政人員，也是濕到化妝都融埋。

最終闖入大堂問經理，佢木無表情答（可能畀人問咗N次）：「出門口轉右，冇明顯招牌，有道日式門，有細細個字『Minato』，按電掣，門就自動開。」

哎吔吔，呢間Minato設計師真真大整蠱，家陣同客人玩捉迷藏咩。

終於入到去啦，由炎熱天氣轉入冰冷大廳，反差極勁。咦，別有天地喎，樓底高高，間嘢未聽過，即新開啦，竟已坐咗八成客。

睇睇，哦⋯⋯原來食日本料理及鐵板燒。

H哥宴客，當然唔會手軟，應該幾重錘吓。哈，點解能夠一開就咁多客呢？唔係話香港飲食業如今「水深火熱」嘅咩？

終於明啦，因見到揸Fit人Gary現身打招呼。何許人？正是鷹君集團旗下飲食部門總領導，長期管理米芝蓮的「明閣」，熟客眾多，當然一開就嚟捧場。睇環境，應屬鷹君集團大老闆羅嘉瑞最新「飯堂」啦。

好唔好食？邊有得唔好吖，如此檔次，出品及質素當然冇得輸啦。

不過咁，我呢類普通消費能力小市民，最少中條孖T先可以嚟，否則一定畀人問點解「突然富貴」！