【曾智華專欄】老闆百態（二）

昨日講到香港大老闆，千奇百怪乜都有，下屬通常評語——好鬼惡頂。

正常吖，若非夠辣夠狠數口精，點會做到大老闆？大富豪中有邊個係純情善男信女？

講到大老闆百態，今日再斬三両！

甲總裁：我老闆著名孤寒算死草，雖則幾十億元身家，但仍乜都仙仙計仙仙鍊（正常生意人本色也，所以總裁只可打死一世工）。大佬呀，千幾萬元年薪請我返嚟，成日追住問的，並非公司有邊處新領域可以投資賺大錢，而係講出冇癮，不停問公司仍有邊處可以慳、可以Cut，尤其強調廢物利用，不准浪費水電，員工不得濫用公司資源（紙筆⋯⋯甚至廁紙），搞到我變細眉細眼管理，真冇癮！」

乙執董：「我老闆一樣，香港人人識，傳統大富豪，錢多到幾代使唔完，但佢用每一分錢都死計爛計。佢最喜歡用錢來無蹤去無跡，故此，使錢通常唔會有記錄，基本唔碌信用卡，支票也少用，總之經常成身金牛。佢有鋪習慣，久唔久，大約三幾個月，就會靜雞雞叫我入辦公室，攞出個雞皮紙袋，內有一百幾十萬元金牛，笑笑口話：『你做得咁好，私人獎金，唔好話畀人知呀！』點解要畀現金？又係要冇記錄啩？」

C老總：「我老闆大性大情大開大埋，非常情緒化，好喜歡當面鬧人，但鬧完之後，第二朝會向你私下道歉。另有一弊，佢冇家室，晚上發悶時，又纏住你要求陪飲，兩杯到肚苦水猛吐，冇晒日間的英明神武形象。其實香港不乏呢種『日夜兩面人』，老友管理豪華會所，話不少著名富豪皆如此。」

正常吖，大富豪也是人一個，自然有正常人性。總之，收人工打份工，同老闆合則來，不合則去，兩不相欠！