【曾智華專欄】老闆百態（一）

自己知自己事，小弟從冇興趣也不會與富豪交朋友，因圈子不同，價值觀念不同，亦冇乜意欲打商界工。對，以前個個禮拜要訪問各界頂尖人物，當然包括香港著名富豪，不過，訪問完，緣份也即完，呢類大老闆與我的圈子永不重疊。

高級打工仔或打工皇帝又唔同，可以交朋友。佢哋個個要受老闆氣（份豐厚人工早包括畀老闆省又或出賣自尊），啱傾的話，我好願意聽佢哋呻老闆啲古怪嘢。某晚又開壇。

A總裁：「老闆請我時，年薪極勁，另加花紅，高過所有挖角者。不過佢有一條件，必須二十四小時開手機，一Call即聽，不得有誤！起初以為佢隨口噏，上任後先知嚟真！就算大家在世界不同城市、不同時區，佢根本唔理，二十四小時畀指示，二十四小時問公司嘢！」

B總裁：「我老闆更惡頂，全天候工作狂，人生冇家庭，只有事業，日日搏大命，永遠唔放假，所以，當你申請假期時，佢會𢲡晒口面問：『做乜放假呀？』就算勉強批咗，當你攤喺泳池，以為可以鬆弛時，佢睬你都儍，照打長途問東問西，擺明唔記得又或唔理你係咪放緊假。」

C執董：「我老闆好少少，每日畀返兩個鐘頭私人時間我，因佢著名愛妻號（懼妻？），老婆大人規定晚晚要一齊撐枱腳，故老闆凡應酬，只到酒會與主人家握握手就閃回家。不過，你咪以為佢收工，因陪完老婆，晚上十點又搏命！我經常凌晨收到佢Email，好彩只是間中有緊急的，否則早早搞到神經衰弱。」

以上三位打工皇帝，講出好慘，不過，位位年薪幾千萬元計，加埋花紅，你同我做成世都未必有咁豐厚收入，食咗鹹魚渴死都抵啦。