26岁丽英入行后好自卑:啲女仔又高眼又大 遭旧爱嫌弃冇晒自信吓到唔敢拍拖丨独家
丽英(邓丽英)今年推出“爱情3部曲”企划,年初的《美男子图鉴》玩收集男神过足瘾,新歌《解咒说明书》就讲情伤。提到情史,26岁的丽英收起笑容,指学生妹时期被旧爱狠飞,原因竟然同衣着有关,此次情伤更令她冇晒自信,唔敢再拍拖。采访:杜杜 摄影:林宾尼 发型:Marco Li化妆:Hulda Tsai 场地:火土烧肉hearth Yakiniku by Atum


丽英推出“爱情3部曲”,有感这类题材较令歌迷有共鸣,“3部曲系上年目标,想啲歌有个系列,3首歌写爱情嘅唔同状态,好似第1首《美男子图鉴》讲对爱情憧憬,喺花多眼乱嘅世界拣钟意嘅人,《解咒》就讲失恋、情伤嘅状态,至于第3首就唔讲住,想保持神秘感。”之后她忍唔住“剧透”压轴作品计划年底推出,“歌曲系列用书做主题,好似图鉴同说明书,第三首都系同书有关。”


曾因失恋不断自责
《解咒》跟丽英一贯的歌曲风格相反,是她刻意安排,“以往我都系用开心乐观一面示人,其实都有啲深刻回忆,想同大家分享。《解咒说明书》系我分手经历,好sad。”该段感情伤透她的心,事关分手原因是被男方嫌弃,“对方嫌我着得太多T恤牛仔裤,呢个竟然系其中一个分手理由,当时我震惊加非常伤心。”她做最真实的自己竟被指摘,觉得好无奈,“着T恤牛仔裤系我最舒服嘅状态,我识佢之前成日咁着,但无奈冇咗爱喺裹面,先会有咁嘅变化。”


这段“嫌弃之恋”在丽英读书时发生,虽然只维持1年多,但却刻骨铭心,“读紧书仲系好green,拍过几次拖就唔讲嘞,但肯定系最深刻一次。”惨被狠飞后,她曾自困失恋黑房又不断自责,更因吓亲唔敢再拍拖,“一直处于冇自信阶段,成日问自己系咪好差,对价值观亦有所怀疑,我系咪真系做错咗呢?!好自卑。”时间是最好的疗伤药,“只要一个人唔钟意你,你着咩都会唔钟意你,讲到尾佢都系唔再钟意我啫!”回复清醒状态的丽英,慢慢想通才得以自愈,“受咗情伤都唔应该定义自己价值,会学识点样去爱自己。”她想以自身经历,安慰受过情伤的人,“好多人喺爱情上俾人嫌弃过,但通常嫌弃对方唔够上进或者好穷,外表好多问题,所以当时俾人嫌弃真系唔好受,以往要揾个钟意你最真实嘅人,而唔系要迎合佢。”


拍MV勾起情伤回忆
因为“嫌弃之恋”受到沉重打击,丽英学懂更爱自己,择偶条件亦唔同晒,“𠵱家会focus自己多啲,同对方相处,佢接唔接受到我系一个咁样嘅人?!亦会用最真实姿态去面对对方,相处得舒服,可以接受到我着T恤牛仔裤先系最好。”她坦认人行后仍然缺乏自信,到加入网台“小薯茄”,被粉丝赞赏才有改善,“自己都会嫌弃自己,点解行内嘅女仔,对眼又大又生得高,自己点做到?!但唔系囉!自己价值自己定,真诚系好大本领,将自己最真一面Show出嚟,自然会吸引到人。我入咗《小薯茄》,才华俾人欣赏到,所以就慢慢建立返自信。”



《解咒》MV在日本和香港取景,有两地型男任男主角,应该好开心,但丽英拍亲感情戏都会勾起惨痛情伤回忆。“日本拍MV内容讲攞洗完嘅衫返屋企,但个袋穿咗搞到一地系衫好狼狈,谂起以往跟男友一齐做,𠵱家只得自己一人而爆喊。”丽英现实失恋时都试过行一段好长嘅路返屋企,“等自己冷静啲,唔想畀屋企人睇到我喊,有呢个感受,好快一take就搞掂,通常cut机会好快好返,但今次cut咗机仲喊紧。”而在港拍的甜蜜拍拖戏,她一样不好受,“拍𠮶时好难好开心,谂返起太多回忆,又系有啲重叠感觉,拍拖有几开心,分手就会有几唔开心。”


>>>星岛网WhatsApp爆料热线(416)6775679,爆料一经录用,薄酬致意。
>>>立即浏览【生活百答】栏目:新移民抵埗攻略,老华侨也未必知道的事,移民、工作、居住、食玩买、交通、报税、银行、福利、生育、教育。
