【曾智華專欄】謝謝推廣「港鐵運動場」

上周二本欄標題《狂風暴雨酷熱運動場》，一半講笑，一半講真！因個人需要每日步行及拉筋四十分鐘，以維持基本健康及身體柔軟。只是近兩周天氣極度反常，早前日日倒水咁倒，之後日日酷熱警告，熱到人都
，咁點可以在室外做運動？

純粹忽發奇想，試吓揸車泊土瓜灣錶位，然後走落港鐵站大堂，咦，非繁忙時間好正噃，冇乜人，有冷氣，乾淨企理，行人通道又闊又直，來來回回走幾次已達標（約三公里），於是在此寫出來。

刊登前，老婆大人負責打稿，嘲笑：「你衰喇，咁寫法，容乜易個個捐晒入去港鐵站，又唔係搭車，只行來行去，港鐵公司真係多得你唔少嘞！嬲你唔知，話你唔好意思。」

究竟會否真的如此？好易知啫，專欄出街後，我將佢傳畀港鐵老友，諗住博鬧。

點知，哈哈哈，原來唔係，對方反應出乎意料之外，竟然多謝我。

喂喂，大家估唔估到點解呢？有冇人揸咗港鐵股票，想知為乜要多謝小弟呢？

原到港鐵公司收入眾多，其中之二為收廣告費及收租。

廣告，易解釋，接觸得越多人，收費可以越貴。故此，若個個當港鐵大堂為「運動場」，唔搭車都落去行吓，等於谷大人流，令廣告接觸面更大，理所當然，廣告費可以收高啲。

另外，大家應知，港鐵所有附屬地方，無論是黐住的商場或站內大堂，皆有大量出租舖，你可知每間舖租金多少？冇人行拍烏蠅，當然難叫高租值。但若果日日人來人往，咁就唔同喇。港鐵老友最精明：「碌Sir，你提倡大堂當運動場，最好個個行到又渴又餓，要買水買食物，咁就更正，我哋有得分成㗎！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。