【曾智華專欄】扭橋扭到亂晒龍

近日港產電影界不斷發出哀鳴，因過去一年幾套投資極勁的大片（未必等於好電影），除《九龍城寨之圍城》外，票房皆不如理想，相信好難收回成本。

電影投資者也是生意人，一部兩部三部都蝕，當然縮手啦。

以前好得的「巨星效應」，如今也紛紛失靈。幾部超級大卡士片，包括梁朝偉的《金手指》、周潤發的《別叫我賭神》、張家輝及陳偉霆的《爆裂點》，在內地（是主要市場喇，早早並非香港了）票房全不似預期，唔知點解。

其實本欄的長期讀者一定知點解，因我曾在此指出，上述三套片只得《金手指》勉強過關，其他兩套根本唔係路，浪費大好演員，也浪費了龐大的製作費。

如今投資者紛紛縮手，究竟點行落去呢？其中（我話其中咋）一個方法，將巨星佔有的天文數字製作費，攞去鼓勵更多具天分的編劇搞劇作。因為劇本乃電影的靈魂，如今太多錢放咗去請巨星（不少演出根本名不副實）及搞科技飛車槍林彈雨（早睇到厭），令不少劇本變得求求其其。老友，咁奀人工，如何吸引高手出招呀？

不過，說來也有點無奈，因電影是一個相當邪門行業，故此，普通水準製作，也可能突然無厘頭地爆大冷。

例如今期上映的《默殺》，竟在內地狂收，相信不少製作人睇完，都會搲晒頭，唔明套片點解咁收得。

此片乃大馬導演柯汶利的作品，雖然已標明兇殺懸疑片，但套戲玩懸疑，玩到古靈精怪甩晒轆，劇情隨意亂扭，我一邊睇，一邊歎句：「嘩嘩咁都得，原來咁扭又得。」

近期不少內地犯罪片多改在東南亞拍，因唯有當地警察先會「咁款」，內地的絕不會如此也。