【曾智華專欄】最刺激的總統選戰

美國總統選舉大戰，若單睇香港傳媒，極度唔過癮，因又欠片又欠分析，更欠將所有主角玩到殘的棟篤笑！

美國文化，鬼叫你參政？出得嚟行就預咗畀人玩，不是簡簡單單玩，而係玩到你殘！

所以，在美國做政客，面皮必須一丈咁厚，受到雷霆攻擊時，心態一定要當佢「唱歌」而唔係「唱衰」。無他，政治現實，你企哪邊都會受到一半人狂砌。

美國政情變化之快，令人眼花繚亂。兩星期前特朗普被暗殺，立時變成國家英雄Fight Fight Fight，那刻全世界買佢贏拜登兩條街。勢頭咁勁，再捧個副總統候選人萬斯出嚟，又即成當紅炸子雞，萬眾矚目。

點知民主黨輕輕一招「逼」拜登唔玩，將所有資源及支持「隊」晒落賀錦麗，嘩，成場大戰火速反轉。賀錦麗最叻係——笑，日日掛在臉上的笑容，對比特朗普又老又串個款，熒幕上出現乜嘢化學效果？香港人點睇唔重要，最重要係有權投票的美國人點睇。

呢場賽事日日在變，搞到連特朗普被行弒這「正因素」也耗盡了。佢同萬斯點繼續打選戰呢？暫時狂特仍沿用「膚色、種族、性別」等不智策略攻對手，但不知不覺間得罪晒全國有色人種及女性。弊在冇乜人可以影響佢價值觀，睇嚟佢贏就是贏獨特個性，輸也會是同一理由。

介紹大家睇Netflix的《絕望者之歌》，萬斯自傳版電影，四年前上映，冇乜人留意，但四年後今日，關心全球政治走向者一定要睇，因萬斯分分鐘會變美國總統！佢出身非常坎坷，不單止窮，阿媽更濫交吸毒，在大逆境中竟能殺入一級大學，如今更登上政壇頂峰，發展過程充滿戲劇性，睇啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。