【曾智華專欄】人人講、做、扮⋯…等於⋯…

世間不少事情，皆有一個定律、一個軌跡，若你在當中長期體驗，自會明白，變「老是佛」後，就可避過不少劫。

有青春無限者指：「定律是要來打破的！」錯唔晒！不過，一條定律經千百次驗證，你打破佢一或幾次，只似幾滴水進入海洋，冇乜代表性，除非能夠頻頻推翻。

投資界尤多定律，其實好易掌握。只不過升市時大多數人會因此得益，參與者基於貪婪及財迷心竅，雖知好景不常，但多會「自己呃自己」——我一定能夠爆煲前跳船！

慘在歷史紀錄上船「享受」的人多，火災前識跳船者非常少。

近兩年大家領略最深的，當然是樓價跌吓深啲，跌吓又深啲。

出奇嗎？絕不，一切有跡可尋。原因就是早早炒到過晒龍！政府2004年後的政策「配合」（唔賣地、唔起居屋）、開放內地人到港炒樓及美國零息率，令樓價爆升，搞到政府畀人鬧到飛起，於是手忙腳亂「倒轉玩」，大量推地加辣招，搞到供求失衡，弊在再遇上疫情、加息及中國經濟下沉，加埋加埋，樓市點可唔冧？

睇大勢，冇人叻得過誠哥，佢永遠掟貨快三步，等你醒時，經已被綁。

最近小弟睇到兩個Trend好唔妥，將會爆煲，令投資者損手爛腳。

第一個為電動車，尤其內地，你做我又做，鬥到爛，鬥到殘，Profit Margin根本冇乜，所以，以為此乃「未來」大趨勢而狂掃電動車公司股票的，請自己執生。

另一為AI，頗有千禧年令人人儍咗的科網潮翻版。大公司固然做，另外也有不少博懵公司，作個貼近AI感覺的公司名，又大炒特炒。

當人人都說AI就是未來，人人都試圖走去做，而老千們又扮話識時，等於爆煲邊緣了！