【曾智華專欄】《劫機1971》忍忍忍

等呀等，《九龍城寨之圍城》之後，終等到一套我認為可推介的電影了，正是近日在韓國大收特收，上咗兩個月仍未落畫的《劫機1971》。

點解會「忍忍忍」呢？」因此片長達一百分鐘，小弟呢類長者，正是年紀大、機器壞，前列腺唔聽話，食早餐時飲完奶茶，再加一公升暖水，當然要成日「殊殊」去也，死忍會出事㗎！

睇早上長者場，若是普通戲，多數開場已經知結局，故此中段發展，唔睇三五分鐘，絕無問題，我從不擔心尿急冇得去洗手間。

不過⋯⋯不過？正是遇上呢套劫機戲，一開場已緊張到飛起，幕幕高潮幕幕金，全院長者相信全部似小弟般，幾大在死忍爛忍，於是由頭到尾冇一個離座。

不過，都幾搞笑，當劇終字幕緩緩升起時，嘩，立時不分阿叔阿伯阿嬸阿婆，個個爭先恐後標去廁所，真真擔心急到條褲都除唔切（直接形容） ！

此片乃是真人真事改編，發生在1971年，南北韓與現今一樣，大家是同根生，但政治理念南轅北轍，故誓不兩立。

編劇及導演皆高手，勝在並沒有濫玩「政治正確」，雖是南韓製作電影，但片中所有南北韓角色人物，甚至劫機者，也沒有絕對忠奸。一切發生的，皆有緣有故，基本上，全是當年歷史場景下的受害者。

電影中有不少場面帶大家入時光隧道，例如上世紀七十年代初坐飛機，經常有一半人在吸煙；又不少「大鄉里」第一次坐飛機，不知規矩，連雞都帶同。以今天標準，更絕難想像機場保安似有若無，炸彈及刀槍都可以帶而冇人知，當然，亦冇人阻止。

細節唔講嘞，總之非常豐富，今期若你只睇一套戲，就睇呢套啦，唔使考慮。