【曾智華專欄】炒車好有型乎？

坊間有好多似是而非的道理，若相信，會被累死，因為太戇居。

例如：「老友，你唔應該轉軚噃！」講呢類說話的人，一是無政治智慧，二是不懂做大事，三⋯⋯可能根本未揸過車。

未詳細解釋前，先講講投注波，有種玩法叫「走地盤」，即一邊作賽，開盤者一邊按形勢改變賠率，總之未到完場，也可能不停在變。因一場球賽雖只九十分鐘，但結果隨時會出人意表，故此必須緊跟形勢作出調校。

賽馬方面的「騎師王」及「練馬師王」也一樣，隔夜開出的賠率，只是操盤手初步分析。但到真正賽日發生的一切，極可能與先前預測完全不同，咁點？立即修正也。這就是精明的轉軚，智者所為也。

今日小弟突然講這本應是「阿媽係女人」的道理，因發覺不時在網上仍有揶揄人「轉軚」，以為咁就等於自己是智者的儍佬論調。

尤其政治世界，正是一日都嫌長。坐在管治位者，必須日日按形勢作評估，然後決定對策。例如中國，肯定有成群智囊每日跟進美國總統選舉形勢。　

十日前，當然認為特朗普機會壓一。但賀錦麗一出選，佢在公眾場合表現使人另眼相看，顯示佢做副總統時，無論自己及背後勢力，根本未出招。好嘞，如今正式出賽嘞，民主黨幕後政治勢力及金主，立時全部歸隊，而賀錦麗也毋須再扮「矮仔」（擔心搶去上司拜登風頭）。

一切揭竿而起時，若你仲死牛一邊頸認為特朗普Sure Win？哈⋯⋯

作為政治評論員，此時理應「轉軚」，再按形勢發展，評估未來幾個月走勢。

成日以為自己儍吓儍吓企硬就是有型者，畀佢揸公車死硬，因會成車攬炒也。