【曾智華專欄】有得贏都唔會咁買

星期六，不如又講吓馬！

唞暑後不少馬經版都推出各式統計，畀馬迷用作為新一季投注策略研究基礎。

資深馬迷累積N年經驗及「捐輸」，必定有自己一套刨馬準則。有啲睇騎師，有啲睇馬房，有啲睇評分，有啲睇血統⋯⋯

最普遍是睇賠率。因若有人真金白銀「藕」落某一啲馬，絕不會是儍吓儍吓亂咁「掟飛鏢」，必有其因，故此精明一族大部分時間會採用「跟錢走」作投注決定。另一種方法為「刪除法」，每場二十倍以外的馬，飛得，因「冇咁大隻蛤乸隨街跳」。而賽事日賠率明顯與隔夜不同的，就分類研究。變冷的，打大交叉，應是出現咗負面因素。相反，無情情有人落重飛，令賠率急跌的，必須跟一注。

小弟屬邊派？賠率派！一場馬若超過十隻，邊有時間逐一刨？最易是用剔除法。二十倍以上飛起；無厘頭變冷的，又飛得；減吓減吓，只集中分析六、七隻幾倍到十幾倍的馬，WPQ一於此中尋。

認識不少資深馬迷，認為有一種投注法，八成機會「長途贏硬」，但就是冇乜興趣實行，正是半夾疊買冠軍騎師潘頓。一萬元做本，凡佢騎兩倍以上的，就夾疊買W。

100元開始，輸一場就變150元，再輸買200元，再輸300元……

過往紀錄，潘頓約五場贏一場，W出馬平均派彩率為38.57元。用或然率計，幾場中一場，好快有收成。不過，佢亦會突然有一兩日「遊馬河」食白果，咁你就一定嚇到手震。

用此方法投注者，一定要豁出去，心態是將一萬元視作遊戲費，只等有機會爆場冷冷哋（例如上季「閃電」十六倍）開心吓。

呢個投注法，我全冇興趣，除對「軟硬鞭」有偏見外，只喜歡每場獨立研究。