【曾智華專欄】主席易搵校長難求

兩個月前本欄標題為《校衰口不停》，指的正是近兩年好似撞咗邪（幸而國際學術地位未大幅插水）的香港大學及中文大學。

兩所大學同時發生校董會/校委會主席與校長「互片」（這是公眾觀感）大血戰，互相死咬唔放，好似誓要攬炒，又或將對方趕盡殺絕為止。

老老實實，兩場「盤腸大戰」誰是誰非，外人絕難明白，因無法掌握局內主角的動機，以及仍然有多少「罪證」在手。

不過，若為香港最高利益出發，任何有理性市民，必不想再見到兩大的主席及校長用「大喇叭」公開互插。可惜至今最高掌權者——特首，仍未能將幾位「摔角」主角喝停，究竟超哥幾時才會一錘定音？

兩大學之爭，越看越似意氣之爭，理應大事化小。例如中大校長段崇智經已決定請辭，做埋今年拜拜，咁校董會主席查逸超仲有乜需要繼續出聲明去追殺呢？

事實，小弟認識N咁多曾出任香港幾所大學主席的智者（嗱嗱，話明認識咋，冇話係老友呀），近日在飯局中，多多少少提到兩大頂層血戰，無不搖頭歎息，真的難以明白為乜要將個攤子搞到咁爛，究竟對邊個有好處？

曾任大學主席的「精明M」一矢中的：「香港大學界，主席易搵，校長難求！」

現實是不單止大學，任何公職機構（港鐵、機管局、海洋公園、貿發局⋯⋯）搵主席，真真易過借火，因大把人想做，也做得好。

但要搵一個蜚聲國際著名學者做校長，希望借其江湖地位吸引國際猛料學者（例如諾貝爾獎得主）到港任教，難度絕高。

要將香港打造成國際高端人才聚集地，乃中央指示，請問邊個「大學主席」有此本事？