【黃庭桄專欄】吻下來，說Hello

Hello，哈佬，帶善意的問候語，通常會夾雜微笑甚至揮手，是男女老幼常用的開場白。

不過自從因《中年好聲音》而走紅的龍婷，跟已婚的演唱會揸Fit人丘亞葵，在車廂中激吻纏綿後，Hello便被賦予更洋化、更熱情的意思。

既然被《東周刊》獨家踢爆，有圖有真相，怎樣抵賴這段出軌婚外情呢？難道辯稱門牙攝了一條菜，身上又一時之間沒有牙籤，唯有情商對方仗義借出舌頭，伸進自己的口腔來慢慢探索，激情地交換口水，把那條菜挑出來嗎？

對於背妻跟龍婷濕吻，丘亞葵不認不認還需認，解釋說：「只係朋友式嘅Hello Kiss，錫咗一啖面，唔係大家諗到咁。」

從此Hello一詞，又有新定義了，不是SayHi咁簡單，講完Hello之後，原來是要加埋接吻，才叫有禮貌！

明明已經一齊食過晚飯，又睇埋電影，再漫步停車場攞車，又在暗角拍打pat pat，意態撩人，Hello了成晚啦喎，可能感覺始終太陌生吧。於是上到車之後意猶未盡，來個飯後Kiss，這就是他們所說的「兩人之間純屬友誼」。

人真的是活到老，學到老，要做一個有風度的人，必須學懂在不同場合送上不同的Kiss。除了Hello Kiss外，食完早晨全餐，必須送上Morning Kiss。午餐約會當然是Afternoon Kiss。下午茶就是Tea Kiss。如果是星期日拍拖，便是Sunday Kiss。7月見面則是July Kiss。一夜情之吻自然叫One Night Kiss。去法國睇奧運一定係French Kiss。錫完落得身敗名裂，仲唔係Sh*t Kiss？

別忘記，Hello Kiss的Hello，頭四個字母是Hell，地獄也。