【曾智華專欄】天價買水者儍儍哋？

二十多年前訪問外科聖手，綽號「金刀梁」的梁智鴻醫生，講完正經嘢，佢話口乾，跟住揸隻杯，開水喉，裝滿水即「嗗碌嗗碌」飲光。

當時小弟睇到眼凸凸，因自幼開始，所有衛生書籍皆教市民將水煲滾才好飲，而眼前呢位醫學界巨人，竟違反這理念。

佢見我擘大眼，知我諗緊乜，笑笑口話：「曾先生，香港水喉水好清潔㗎，根本唔使煲。我從來都係就咁飲，方便快捷，幾十年如一日！」

當年佢六十歲，今天已經八十五歲，飲水喉水習慣絕無改變，唔似啲身嬌肉貴者經常揚言：「只飲法國礦泉水！」

其實非法國水不飲者，有幾多健康過，又或長壽過梁智鴻醫生呢？

多少受佢影響，我亦從來唔飲「貴水」，要飲就飲最廉價普通過普通的樽裝水。

小弟當然知作為一種商品，水可以畀到人一種虛榮感，由產地、包裝、牌子、價錢，全部加埋加埋，搞到揸住支名牌水四圍行就感覺好威，似1997年前揸份西報通街走一樣。呢種心態冇乜唔正常，但以為咁就高人一等，自己呃自己。

消委會最新測試，將所有牌子飲用水，由三兩蚊支到三幾十蚊支全部化驗，發覺根本冇乜唔同，貴的並不特別對身體有益；平的由解渴到一切效果，與幾十蚊的一樣。

咁講，用幾十蚊買貴水一族，咪有啲儍儍哋？

最近認識一位報攤專家，佢話：「碌Sir，你可知做報攤及便利店，最賺錢係乜？」

「香煙？避孕套？杯麵？汽水啤酒？」我答。

「全部唔係，係水！一支水成本一個幾毫，內裏乜都冇，用膠樽載住就可賣幾蚊，利潤之深，勁犀利，冇乜人知㗎。」

老友，其實使乜吓吓買水吖，用個樽裝煲過嘅水飲，效果一樣啫。