【曾智華專欄】態度囂張的豬頭

師傅教落，任何時候，當形勢比人強，就要使出絕招——忍一時風平浪靜，退一步海闊天空！尤其身在外地，特別要謹記。

上周與幾位老友晚飯，當中包括紀律部隊大Sir阿D，講到先前去美國旅遊，入境時的谷鬼氣經歷，嬲到震，發誓以後唔再去。

究竟發生乜事？

凡到過美國的，必知當地法律不容許種族歧視。不過，不容許不等於冇。事實上，普遍存在白人歧視黑人，黑人歧視其他膚色的人，當然包括黃皮膚的華籍人士，入境過關時，慣性呼呼喝喝，禮貌多欠奉。

D Sir過海關，即被「玩」。黑人關員當眾周身搜，搜完又搜，連敏感部位都「𢭃」幾嘢。

D Sir自己也執法，當然知咁搞唔多正常，於是細細聲提出：「Sir，你咁搜法，係咪應該入房做呢？」

一講，立即刺激到對方神經，大大聲問：「你係咪想入房搜？」

D Sir立即收口，因知一旦入房，更可乜都做得出，玩殘你容乜易，一聲話有懷疑，就剝光豬逐寸搜。於是火速沉默，忍⋯⋯深呼吸，然後Say Sorry。

這就是現實，在別人勢力範圍內，要學忍，否則後果堪虞。

剛剛讀報，見到個豬頭司機，上周末凌晨駕車剷上行人路，當然錯晒。警察來到，竟然態度囂張，執法人員循例先做呼氣測試，冇超標，但曾飲酒，於是在警戒下搜車。司機串串貢不斷用語言作挑釁，幸而記者在場，否則⋯⋯不過，仍收不小心駕駛告票。

不小心駕駛，扣分外，必須上庭，罪成後罰款，再要自費上駕駛課程，兼且留有不良紀錄。

呢個豬頭司機，究竟知唔知乜叫忍一時風浪？串串貢以為好醒，若在美國遇黑人執法者，必定一入境即被反轉嚟玩。