【星爷讲波 31】欧国杯决赛：西班牙对英格兰 长胜军大战不败狮

周日(14日)：西班牙 Vs 英格兰 (加东时间下午3:00)

头尾足足31日嘅2024欧国杯，话咁快就到咗冠军战，由三届盟主西班牙火并连续第二次杀入决赛嘅英格兰。

讲声势，英格兰先赢一仗，呢几日关于佢哋嘅消息比西班牙多何止一倍，例如捧杯可以得折合约1亿港元嘅奖金；英格兰飞柏林机票短缺，即使私人飞机机票涨价至折合约18万港元都一票难求；比宁咸肩伤食止痛药顶埋决赛；赖斯承诺捧杯饮人生第一杯啤酒；英队决赛输波修夫基都获续约⋯⋯场内场外都咁精彩，好睇过戏。

讲番明日场冠军战，西班牙嘅战绩同气势真系一时无两，杀入决赛6场波全部赢晒，连和波都无，如果决赛都赢埋就正宗长胜军，实至名归嘅欧洲王者。

英格兰当然唔似西班牙咁场场赢波，但其实佢哋6场都无输过。换言之，要赢佢哋一啲都唔容易。

根据最新军情，双方出战冠军战嘅人脚大致落实，但各有一个位置仍悬而未决，西班牙中坚人选会系停赛期满的拿洛文特和拿祖费南迪斯之间二选一。至于英格兰，到底左翼衞系新近伤愈嘅劳基梳尔，抑或一直表现不过不失嘅捷比亚，修夫基仍然未有定案。

今场比赛关键看点，星爷认为只得一个，就系英格兰后防如何抵挡火力十足嘅西班牙攻势，尤其系西班牙左路有速度奇高的尼高威廉斯，右闸基尔获加状态不俗，但亦未有十足把握可以箝制到呢位当打嘅快翼。就算左边可以摆平，来自新人王耶马右路可传可射嘅攻势，英军右路守将，不论系劳基梳尔抑或捷比亚，睇嚟都好头痕。矛盾大战，一触即发！

星爷咁睇，西班牙晋级路上的对手卡士强劲，上届冠军意大利、东道主德国、世界排名第二的法国，全部都称臣佢哋脚下，证明佢哋系靠表现同实力入决赛，绝唔系侥幸。所以，虽然星爷讲过，大部分捧杯球队，夺标路上多少都有啲阻滞，好少话全程顺风顺水，但呢支西班牙队确系太强劲，近乎无坚不摧，完全睇唔到佢哋捧唔到杯嘅有力证据，所以今次星爷都要一改平日谂法，亦同AI拍档唱反调，一于捧西班牙九十分钟赢波捧杯。

双方可能正选阵容

西班牙：

门将：乌尼西蒙

后卫：丹尼尔卡华积、拿洛文特、拿朴迪、古古列拿

中场：法比安雷斯、洛迪、丹尼奥莫

前锋：耶马、莫拉达、尼高威廉斯

英格兰：

门将：比克福特

后卫：基尔获加、史东斯、马克古希

中场：布卡约沙卡、高比马恩奴、迪格兰赖斯、劳基梳尔

前锋：比宁咸、科顿、哈利卡尼

AI预测：

西班牙 Vs 英格兰 (下午3:00)

预测赛果：英格兰胜

半场比分：西班牙 0-1 英格兰

全场比分：西班牙 1-2 英格兰

总入球数：3球

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。